Zgjedhjet në Kosovë, LVV 41.07% pa diasporën, ja fitoret spektakolare në bastionet e PDK, LDK, AAK
Përkundër synimit të parealizuar ëndërrimtar të Albin Kurtit për 500 mijë vota dhe një rënie të votave në krahasim me zgjedhjet e kaluara parlamentare ku dhe pjesëmarrja ka shënuar rënie, Lëvizja Vetëvendosje korri një fitore spektakolare kundër gjithë propagandës që u ngrit në këmbë kundër Kurtit, me batonë, buzhalë e grenell, dhe, të gjithë mediat kundër duke përfshirë dhe televizionin publik të Kosovës, RTK!
Sot kur nuk janë numëruar ende votat e diasporës që shkojnë mbi 10% dhe sipas rezultateve paraprake të KQZ është shënuar një pjesëmarrje prej 799.954 votave ose 40.59 për qind, ndërsa nga 88.99 për qind e votave të numëruara Lëvizja Vetëvendosje renditet e para me 308.572 vota ose 41.07 për qind, PDK e dyta me 166.708 vota ose 21.99 për qind, LDK me 132.396 vota ose 17.62 për qind dhe AAK me 57.285 vota ose 7.65 për qind.
Pavarërisht se Kryeministri Albin Kurti shpalli fitoren e Lëvizjes Vetevendosje duke siguruar se koalicioni i tij do të formojë Qeverinë e re “Kurti 3” me rezultatin aktual është e pamundur.
“Zgjedhjet ishin të lira, demokratike dhe të ndershme. Faleminderit për besimin e dhënë nga votuesit e koalicionit tonë. Ky është një rezultat i një qeverisjeje të mirë. Koalicioni jonë fitues do të formojë Qeverinë e re të Kosovës, Kurti 3,” tha Albin Kurti ndone duhen shumë kompromise për Qeverinë Kurti 3 ndërsa tha një të vërtetë mbi partitë tjera, që edhe sikur të bashkohen, nuk mund të krijojnë qeveri pa votat e Vetevendosjes.
Përveç rënies së votave të përgjitshme, Lëvizja Vetëvendosje shënoi një rezultat spektakolar në bastionet e PDK, LDK e AAK.
Fitore e madhe e LVV padyshim është ajo në Mitrovicë nga vjen kandidati për Kryeministër i PDK, Bedri Hamza, me 56.23 për qind duke lënë mbrapa PDK-në e Hamzës me 30.81 për qind, ndërsa gjurmë ka lënë dhe fitorja në Ferizaj 51.01 për qind dhe PDK në pushtetin lokal mori vetëm 27.53 për qind.
LDK që propagandonte kryeministër liderin e saj Lumi Abdixhiku ndërsa mbështetej nga oligarkët kryesor të Kosovës humbi të gjitha bastionet duke përfshirë dhe vendlindjen e liderit historik Ibrahim Rugova, Istogun me 35.25 për qind ku LVV arriti të fitoj me 35.73 për qind.
Por LDK me turp humbi dhe kryeqytetin Prishtinën ku mori vetëm 25.54 për qind ndërsa LVV arriti të marrë 46.8 për qind! Kur LDK humbi vite më parë Gjakovën u mendua se ndodhi hataja por jo, hataja ndodhi dje kur ajo humbi në Pejë me 41.49 për qind të LVV ndërsa LDK arriti të marrë vetëm 27.99 për qind, si dhe në Gjilan me 51.54 për qind të LVV dhe LDK që me shumë turp mori vetëm 21.73 për qind.
Albin Kurti sot mund të ul kokën pse nuk mori 500 mijë vota në Kosovë por ai është krenar për fitoren në Gjakovë duke rrëzuar mitin e Ramush Haradinaj me një fitore bindëse me 47.15 për qind duke lënë mbrapa AAK-në me vetëm 19.7 për qind.
Në fund, në pritje të rezultateve nga diaspora, të gjitha mundësitë e koalicioneve mbeten të hapura pavarësisht se çfarë llapin batonët, buzhalët dhe grenellët, të cilët nuk arritën ti sjellin qytetarëve të Kosovës asgjë më shumë se një fitore të zjarrtë me exit polle për vetëm 3 orë, që votat në kutitë e votimit e lokalizuan këtë zjarrë shumë shpejtë
Ndryshe, në zgjedhjet parlamentare të vitit 2021 ku pjesëmarrja ishte me 903.379 votues ose 48.7 për qind, Lëvizja Vetëvendosje u rendit e para me 50.28 për qind duke lënë pas PDK-në me 17.01 dhe LDK-në me 12.73 për qind.
