Kurti: Qytetarët presin nga ne formimin e institucioneve
Në mbledhjen e sotme të Qeverisë së Kosovës, Kryeministri Albin Kurti ka kërkuar nga kabineti qeveritar që të vazhdojnë punën me ritëm të njëjtë ndërsa si fitues të zgjedhjeve të 9 shkurtit, qytetarët presin sa më parë të përmbushin obligimin që u takon për krijimin e institucioneve.
“Kemi hyrë në fazën finale të procesit të numërimit të votave për zgjedhjet e 9 shkurtit. Sot fillon numërimi i votave të diasporës, sipas njoftimeve të KQZ-së, më së largu deri në javën tjetër pritet të kemi rezultatet përfundimtare për subjektet politike. Si fitues të qartë të këtyre zgjedhjeve nga ne qytetarët presin që sa më parë të përmbushim obligimin që na takon për formimin e institucioneve në legjislaturën e nëntë. Deri atëherë nga ju kabinet qeveritar pres që të vazhdoni punën dhe punët e mira me po të njëjtin ritëm,” tha Kurti duke shtuar se të gjithë presim nga KQZ edhe më shumë angazhim për përfundimin e procesit të numërimit.
“Presim kujdes të shtuar në mbrojtjen e vullnetit të votuesve, për të përmbyllur kësisoj një proces zgjedhor të lirë, të rregullt, të ndershëm e demokratik, me pjesëmarrje masive të qytetarëve, për çfarë falënderoj secilën dhe secilin. Pjesëmarrje më të lartë ndonjëherë në zgjedhje pati edhe diaspora jonë, e cila për herë të parë përveç votimit me postë pati mundësinë të votojë edhe në ambasadat dhe konsullatat tona,” tha Albin Kurti ndërsa falënderoi bashkatdhetarët që morën pjesë në këto zgjedhje, qoftë përmes votimit nga jashtë, qoftë përmes udhëtimit në Kosovë për të votuar, duke u bërë ashtu siç janë pjesë e pandashme e vendimmarrjes në vendin tonë.
Me këtë rast foli për lehtësirat që si kabinet qeveritar kanë bërë për bashkatdhetarët.
“Një prej lehtësimeve më të mëdha është njohja e patentë-shoferëve të Kosovës nga vendet ku ata jetojnë dhe punojnë. Kjo përveçse ul shpenzimet dhe kursen kohën, mundëson integrimin më të shpejtë në tregun e punës,”, tha Kryeministri i Koosvës duke saktësuar se fillimisht ishte Gjermania ajo që i njohu patentë-shoferët kosovarë dhe nga hyrja në fuqi e marrëveshjes, nga prilli i vitit 2023, rreth 30 mijë bashkatdhetarë konvertuan patent-shoferët nëpërmjet kësaj marrëveshje.
“Nga muaji i kaluar ka hyrë në fuqi marrëveshja me Italinë për njohjen e patentë-shoferëve. Ndërkaq, nga muaji i ardhshëm, siç ka njoftuar edhe Ambasada jonë në Austri hyn në fuqi ndryshimi i Rregullores zbatuese të Ligjit të patentës së shoferëve në Austri, gjë që lehtëson procedurën e konvertimit të saj për shtetasit e Republikës së Kosovës,” tha Kryeministri i Kosovës duke bërë të ditur se janë në proces të finalizimit të njohjes së ndërsjellë të patentë-shoferëve janë edhe me Kanadanë dhe Turqinë.
