Vuçiç organizon tubimin më të madh në histori nga 11 deri më 13 Prill në Beograd

Tubimi i Partisë Përparimtare Serbe, SNS, të Aleksandar Vuçiçit që ishte paralajmëruar si protesta më e madhe në historinë e Serbisë dhe një përgjigje ndaj protestës që mbajtën studentët më 15 mars, do të mbahet nga 11 deri më 13 prill.

Lajmin e kanë bërë të ditur mediat e regjimit në Serbi, duke saktësuar se mitingu i Lëvizjes për Popullin dhe Shtetin do të mbahet nga data 11 deri më 13 prill në sheshin para Parlamentit të Serbisë.

“Sipas burimeve tona, në një nga tubimet do të flasë edhe presidenti i Republikës së Serbisë, Aleksandar Vuçiç,” shkruan e përditshmja serbe Novosti ndërsa Blic thekson: “Takimet do të mbahen disa ditë. Gjatë këtij manifestimi pritet një numër i madh ngjarjesh dhe të gjitha do të jenë para ose afër Parlamentit. Tubimet do të mbahen disa ditë.”

Ndryshe, Vuçiç më herët në televizionin publik RTS tha se mitingu do të mbahet më 28 mars dhe ftoi gjithë “Serbinë punëtore, fshatare, të ndershme që është ngopur me të gjitha këto, në mitingun më të madh në historinë e Serbisë”, por, ky miting u anulua.