Demo Berisha propozohet ministër i Serbisë, Kamberi: Oficer serb i përfshirë në krime të luftës në Kosovë!
Pas propozimit të autoriteteve serbe për ta emëruar Demo Berishën ministër për të Drejtat e Njeriut dhe të Pakicave, ka reaguar ashpër deputeti i vetëm shqiptar në Parlamentin e Serbisë, Shaip Kamberi, duke theksuar se ai nuk është një përfaqësues i të drejtave të njeriut, por një simbol i mohimit të identitetit kombëtar dhe politik të shqiptarëve të Kosovës dhe të Luginës së Preshevës.
“Ky emërim është jo vetëm politikisht i papranueshëm, por edhe moralisht i turpshëm. Sepse Demo Berisha nuk është një përfaqësues i të drejtave të njeriut, por një simbol i mohimit të identitetit kombëtar dhe politik të shqiptarëve të Kosovës dhe të Luginës së Preshevës. Siç dëshmojnë pamjet, deklaratat dhe intervistat publike, Demo Berisha është një ish-oficer i ushtrisë serbe, pjesë e strukturave që kanë qenë të përfshira në krime të luftës në Kosovë,” shprehet Shaip Kamberi në reagimin e tij përmes rrjetit social Facebook ndërsa saktëson se Demo Berisha nuk është një përfaqësues i të drejtave të njeriut, por një ish-oficer i ushtrisë serbe, pjesë e strukturave që kanë qenë të përfshira në krime të luftës në Kosovë.
“Edhe pse thotë se është nga Peja, ai publikisht deklaron se atdheu i tij është Serbia, se Kosova është ‘Kosova e Metohisë’ dhe mohon ekzistencën e Republikës së Kosovës. Jo vetëm kaq – ai është themelues i një organizate me emër serb, ‘Matica Albanaca Srbije,’ ku mbrohet trashëgimia e bashkëpunëtorëve të Serbisë në periudhat më të errëta të historisë sonë, madje edhe Esat Pashë Toptani, i njohur për tradhti ndaj kombit shqiptar.” thekson Kamberi duke e krahasuar Demo Berishën me Faik Jasharin, pjesëmarrës në delegacionin e Serbisë në Rambuje, duke e quajtur atë “Faik Jashari 2.0”.
“Ai është simbol i një të kaluare që ka përfunduar… një figurë e harresës dhe disfatës, figurë kuislinge. Ndërsa Demo Berisha, i cili ndan të njëjtën ideologji me Jasharin – që Kosova është Serbi dhe shqiptarët duhet të nënshtrohen nën këtë realitet – po promovon këtë frymë si ‘shqiptari model’ për Serbinë.
Ai shfaqet në intervista duke mohuar NATO-n, duke përkrahur narrativën serbe për luftën dhe duke u paraqitur si përfaqësues i shqiptarëve në Serbi. Ai është përdorur dhe po përdoret si një mjet propagandistik për të legjitimuar narrativën se shqiptarët janë të integruar dhe të kënaqur në Serbi – për sa kohë që ata mohojnë Kosovën dhe i binden Beogradit.”
Demo Berisha, sipas deputetit shqiptar Shaip Kamberi, nuk i përfaqëson shqiptarët, por një version të të instrumentalizuar për interesa të politikës serbe, sikurse disa tjerë në periudhën e Milosheviçit. Propozimi i Berishës si ministër nuk është për të drejtat e njeriut, por për vazhdimin e një politike që do të shuajë zërin e shqiptarëve të vërtetë në Serbi, sikurse përfaqëson edhe një fyerje për të gjitha pakicat tjera në Serbi, që përbëjnë 20 për qind të popullatës së këtij shteti, shprehet deputeti shqiptar në Parlamentin e Serbisë, Shaip Kamberi, duke përfunduar:
“Prandaj, ky emërim nuk duhet të kalojë pa reagim – as nga shqiptarët e Luginës, as nga institucionet në Prishtinë, as nga Tirana zyrtare dhe as nga faktori ndërkombëtar. Heshtja ndaj këtij absurdi është bashkëfajësi.”
