Përgjigjja e Presidentes për seancën konstituive: Kushtetuta ju detyron të jetësoni e jo të bllokoni!
Duke u përgjigjur në letrën e kryesuesit të seancës së djeshme konstituive, Avni Dehari, për konstituimin e institucioneve të reja të vendit, Presidentja e Kosovës, Vjosa Osmani shpehet qartë bazuar në frymën e Kushtetutës, dispozitat që ndërlidhen me konstituimin e institucioneve shtetërore duhet ta mundësojnë dhe jo ta pengojnë themelimin dhe funksionimin kushtetues të tyre.
“Në përmbushje të përgjegjësive kushtetuese si Presidente e Republikës së Kosovës, që kanë të bëjnë me garantimin e funksionimit kushtetues të institucioneve, i përgjigjem kërkesës suaj të pranuar sot në Presidencën e Republikës. Si pikënisje, konsideroj se duhet pasur parasysh, se duke u bazuar në frymën e Kushtetutës, dispozitat që ndërlidhen me konstituimin e institucioneve shtetërore duhet të interpretohen në mënyrë që ta mundësojnë — dhe jo ta pengojnë — themelimin dhe funksionimin kushtetues të tyre,” thekson Presidentja Osmani në përgjigjen e saj.
Një parim i tillë, thekson Presidentja e Kosovës, është mishëruar në praktikën gjyqësore të Gjykatës Kushtetuese të Republikës së Kosovës, e cila në Aktgjykimin e saj në Rastin Nr. KO72120, ndër të tjera përcakton se: “struktura e normave kushtetuese që ndërlidhen me themelimin e institucioneve shtetërore që burojnë nga vota e popullit, duhet të interpretohen në atë mënyrë që të jetësojnë dhe jo të bllokojnë themelimin dhe ushtrimin efektiv të funksioneve përkatëse”.
“Në të njëjtin Aktgjykim, Gjykata gjithashtu sqaron se: ‘Asnjë normë kushtetuese nuk mund të interpretohet në atë mënyrë që të bllokojë themelimin dhe funksionimin efektiv të pushtetit legjislativ dhe ekzekutiv’, duke theksuar gjithashtu se qëllimi i Kushtetutës sonë është themelimi i shpejtë i institucioneve. Në Aktgjykimin në Rastin Nr. KO72720, Gjykata Kushtetuese qartazi thekson se: “të gjitha veprimet që ndërmerren nga personat e mveshur me fuqi ose autorizime publike, duhet të jenë në pajtim me Kushtetutën dhe frymën e saj dhe të kontribuojnë në mbarëvajtjen dhe bashkërendimin e punëve me interes publik për Republikën e Kosovës,” tha Presidentja e Kosovës në përgjigje të letrës së kryesuesit të seancës së djeshme konstituive, Avni Dehari, e cila dështoi pas pakënaqsive të opozitës me përmbajtjen e tekstit të dorëheqjes së Kryeministrit Albin Kurti.
Ndryshe, dje, seanca konstitutive e Parlamentit dështoi pasi nuk u miratua Raporti i Komisionit për verifikim të kuorumit dhe mandateve. PDK, LDK, AAK që nuk e vetuan Raportin pretendojnë se është antikushtetues ndërsa Vetëvendosje insiston se kanë respektuar procedurat.
Avni Dehari i cili iu drejtua Presidentes së Kosovës pa dështimit të seancës konstituive ishte kryesues i seancës si deputeti më i vjetër i zgjedhur në zgjedhjet e 9 shkurtit.
