Faleminderit që ishit, Mirush!

nga Albin Kurti

Në Gjakovë, aty ku fjala ka peshë dhe kujtesa frymon me art, u çel një ditë që s’qe thjesht përkujtim, por një rikthim i heshtur i Mirush Kabashit në skenën që e deshi dhe e deshi.

Ekspozita fotografike “Mes Teatrit dhe Filmit”, promovimi i librit në shqip dhe anglisht “Mirush Kabashi Sokrati Shqiptar – Mirush Kabashi Albanian Socrates” nga autorja Driada Dervishi, si dhe shfaqja e filmit dokumentar “100 Maska 1 Shpirt” me regji nga Eliodor Markja, krijuan një portret të plotë të shpirtit të tij të paepur.

I munguar në trup, por i pranishëm në çdo buzëqeshje, në çdo duartrokitje, në çdo frymë të sallës së Teatrit “Hadi Shehu”.

Gjakova nuk mbajti vetëm një aktivitet – mbajti fjalën, shpirtin dhe dritën e një njeriu që na mësoi se teatri nuk është thjesht vend shfaqjeje, por një gjendje shpirti.

Nderim për mjeshtrin e fjalës. Faleminderit që ishit, Mirush. Faleminderit që jeni.

*Fjala e Kryeministrit të Kosovës në promovimin e librit në shqip dhe anglisht “Mirush Kabashi Sokrati Shqiptar – Mirush Kabashi Albanian Socrates”