NATO, stërvitje në Detin Baltik! Rusia: Po përgatiten për një konflikt ushtarak me ne!
Rusia kritikoi sot stërvitjen dyjavore detare të NATO-s në Detin Baltik, një ditë para fillimit të saj, duke e cilësuar “provokim”.
Zv/Ministri i Jashtëm Aleksandar Grushko shkoi një hap para, duke akuzuar aleancën perëndimore se po përgatitet për një konflikt me Rusinë me stërvitjen e saj vjetore BALTOPS.
“Ka të bëjë me shfaqjen e supremacisë në të gjitha fushat: në tokë, det dhe ajër. Sigurisht, ushtrimet e këtij lloji janë jashtëzakonisht provokuese,” tha Grushko për Agjencinë shtetërore ruse të lajmeve TASS, duke shtuar:
“Ne i vlerësojmë aktivitetet ushtarake të NATO-s si pjesë e përgatitjeve për një konflikt ushtarak me Rusinë!”
17 shtete, ushtrimi drejtohet nga SHBA
Edicioni i 54-të i stërvitjes BALTOPS po mbahet për herë të parë në portin e Rostokut në Gjermaninë Lindore. Rreth 50 anije, më shumë se 25 avionë dhe rreth 9.000 trupa nga 17 vende po marrin pjesë në stërvitjen e udhëhequr nga SHBA, e cila fillon nesër dhe do të zgjasë deri më 20 qershor.
Rusia është i vetmi vend në mesin e nëntë shteteve që ka dalje në Detin Baltik dhe nuk është anëtar i NATO-s.
Rusia po kryen stërvitjen e saj
Moska aktualisht po kryen stërvitjet e veta në rajon me më shumë se 20 luftanije, barka me armë dhe anije mbështetëse. “Stërvitjet po kryhen për të testuar veprimet e forcave të flotës në mbrojtjen e bazave,” tha marina ruse.
Sipas televizionit shtetëror, stërvitja, e cila filloi më 27 maj, vazhdon këtë javë.
Stërvitja përfshin korveta, fregata, anije me raketa, nëndetëse të vogla dhe minahedhës, rreth 25 avionë e helikopterë, rreth 3.000 trupa dhe deri në 70 njësi të specializuara.
