Drejtësinë që përzgjodhi e akuzon, Rama: Prokurorë e gjykatës, po mbajnë gjallë forcën e vjetër brutale të Antiligjit dhe Antishtetit

Hoqi çdo prokurorë e gjyqtarë që u kap në rrjetën ideologjike të Vettingut të Ballukëve, dhe sot kur sistemi i drejtësisë kontrollohet tërësisht nga Partia Socialiste, kreu i kësaj partie dhe fatkeqësisht Kryeministri i Shqipërisë, ka vërjetje për vendimet që marrin këta prokurorë dhe gjyqtarë që me raste edhe nuk mendojnë si ai!

Pas akuzave të prokurores nga fshati turistik në Theth, sot Edi Rama zbriti në zemër të Tiranës, akuzoi gjykatësin Balliu, i cili, sipas Kryeministrit, një pallat të tërë pa leje të konfiskuar nga shteti në mes të Tiranës dhe të vendosur në funksion të Agjencisë Shtetërore të Kadastrës, e konsideroi si pronë legjitime të ndërtimtarëve të paligjshëm, duke vendosur masë sigurie në favor të tyre.

“Fatkeqësisht as Gjeli as Balliu, nuk janë të vetmit prokurorë e gjykatës që po mbajnë gjallë në sistemin tonë të drejtësisë forcën e vjetër brutale të Antiligjit e të Antishtetit në dëm të interesave të shtetit, të komunitetit e të njerëzve të zakonshëm të këtij vendi, sa herë që përballë tyre gjenden subjekte të biznesit të madh,” thotë në reagimin e tij subjekti më i madh i subjekteve të biznesit të madh duke i qarë hallin popullit në Facebook thuase Inspektoriatin e Lartë të Drejtësisë e ka zgjedhur populli dhe jo ai vetë, Edi Rama, të cilit i rilind edhe pyetja në vend të ulërimës së revoltës:

“Ku janë institucionet e pavarura të qeverisjes së gjyqësorit e të kontrollit të këtyre shpërdoruesve të pavarësisë së drejtësisë, të cilat prej kohësh po provojnë inekzistencën e tyre në raport me abuzime ulëritëse prokurorësh e gjykatësish të çdo niveli?”

Hëngshin kokat e tyre, tha ai për kriminelët që qeverisin këtë gjyqësor, dhe pse nuk do të vlenin edhe për këtë rast, ndërsa për situatën e krijuar siç duket është i paqartë:

“Njerëzit që na votojnë e kërkojnë llogarinë tek ne për qëndrimet Antiligj e Antishtet të njerëzve të drejtësisë së pavarësuar totalisht nga ekzekutivi. Po ne ku ta kërkojmë llogarinë në emër të interesave të tyre dhe të vetë shtetit, për këto e shumë thika të tjera pas shpinës që Republika jonë dhe plot qytetarë të saj marrin nga Gjelat e Ballinjtë brenda sistemit të drejtësisë, të cilët paguhen prej taksave të shqiptarëve më shumë e shumë më shumë se sa të gjithë rrogëtarët e tjerë të këtij shteti!”

Edi Rama siç duket kot paguan Këshilltarë nga Tel Avivi, në Prishtinë e Londër, sepse zgjidhja për rastin në fjalë është shumë e thjeshtë, llogarinë mund ta kërkojë tek Portali i Bashkëqeverisjes duke i treguar në detaje se si Shqipëria ka një Kryeministër të paaftë, i cili edhe një drejtësi të cilën e bëri nga e para, nuk e bëri dot, dhe mbahet në jetë me përrallat e gjyshes dhe të miletit që thotë:

Drejtësia vonon po nuk harron!