BE: Rruga drejt Bashkimit Evropian kalon përmes dialogut Kosovë-Serbi

Bashkimi Evropian, si ndërmjetësues i dialogut, po punon me palët drejt një normalizimi gjithëpërfshirës të marrëdhënieve mes Kosovës dhe Serbisë, duke adresuar të gjitha çështjet e pazgjidhura.

Kështu janë përgjigjur zyrtarët e Brukselit, pasi që presidenti francez Emmanuel Macron, gjatë bisedës me homologun e tij serb Aleksandar Vuçiq, nënvizoi rëndësinë e bisedimeve Kosovë-Serbi.

“BE-ja pret që Serbia dhe Kosova të përmbushin shpejt angazhimet e tyre ndaj Dialogut, duke pasur parasysh lidhjen e drejtpërdrejtë midis normalizimit gjithëpërfshirës të marrëdhënieve dhe perspektivave konkrete për aspiratat e tyre drejt BE-së. Rruga drejt Bashkimit Evropian për të dyja palët kalon përmes Dialogut të lehtësuar nga BE-ja,” bënë të ditur zyra e shtypit e Komisionit Evropian.

Pas takimit të zhvilluar në qershor në nivel kryenegociatorësh, Bashkimi Evropian shpreh gatishmërinë që të organizojë raundin e ardhshëm të bisedimeve sapo palët të sinjalizojnë gatishmërinë për t’u takuar. Sipas zyrtarëve evropianë, kjo vlen edhe për organizimin e takimit në nivelin më të lartë politik.