Je suis Neni…

nga Agim Popoci

Ndër tendat e bar-restoranteve që po fshiheshin nga faqja e dheut dhe fshatrave turistike që po shembeshin deri në maje të Thethit, ia behu Kodi i ri Penal në qiell të hapur për të konfirmuar atë që në ditët e para të qeverisjes e kishte premtuar dora vetë, Edi Rama: Nuk keni parë gjë akoma!

Nuk është se shqiptarët ishin të informuar për Kodin aktual Penal meqë ai as që zbatohej, por, kur shpërthyen Nenet plotë helm të Kodit të ri, të gjithë kishin kureshtje të shohin se çfarë ka përrallosur ky gjeniu i fjalimeve të Likes që për 12 vjet nuk diti një gjë të hairit ta bëjë, dhe, mori përsipër edhe mandatin e katërt të qeverisjes!

“Asgjë nuk i jep një njeriu të frikësuar më shumë guxim sesa frika nga të tjerët,” thotë Umberto Eco, dhe kjo ishte arsyeja që në këtë Shqipëri të kriminalizuar më i pambrojturi, padyshim është krijuesi i këtij lloji shteti, Kryeministri Edi Rama i cili mbrojtjen e kërkon pikërisht me një Kod më të egër Penal!

Reaguan Prokurori i Përgjithshëm, KLGJ e KLP, shoqatat e gazetarëve dhe bizneseve, e madje edhe BE e OSBE, që nuk ishin dakord me këtë lloj Kodi Penal; Dhe, si zakonisht për këto lloj grupe interesi, Edi Rama, në rastin më të mirë i painformuar, ose, si zakonisht nuk ka lidhje fare me realitetin, ka në maje të gjuhës përgjigjen dhe thotë se, “problem më serioz që ka liria në Shqipëri nuk është as regjimi, as drafti i kodit të ri jo e jo, po masa domethënëse e atyre që e përdorin lirinë vetëm për të bërë sherr e shamata për mungesën e saj”!

Jo, jo, Shqipëria ka vetëm një problem serioz sot dhe ai është, Edi Rama!

Dhe, sot, zgjidhja e problemit nuk janë vetëm ata që vazhdojnë e protestojnë dhe hajn dru nga ky regjim, por, paradoksalisht edhe të gjithë ata që kundërshtojnë protestat duke i cilësuar si diçka të tejkaluar, dhe pëlqejnë prezencën në rrjetet sociale ku  me vetëm një “Je suis…” i lajnë duart me krimin e radhës ndërsa rrufisin kafenë!

Pra, grupe të ndryshme interesi, pa dal në protesta, dhe pa i marrë në gojë fare planet e Saliut sepse vetëm ai ju pengon, duke rrufitur kafenë dhe me një shkelje të të këtij Kodi të ri Penal, mund të jenë pjesë e 100-200 mijë shkelësve të neneve që do të përcaktoheshin në ditët e radhës me “Je suis Neni…”

Shembull, “Je suis Neni 235”! Çdo shqiptar me mendje në kokë e kishte të qartë me Kodin aktual se përdhosja e flamurit është e dënueshme por këtij i shtohet Himni Kombëtar i cili denigrohet në çdo ndeshje futbolli, ndërkohë Presidenti, Kryetari i Kuvendit, Këshilli i Ministrave, Gjykata Kushtetuese, sistemi gjyqësor apo forcat e armatosura nuk kanë kurrfarë roli në shtetin e Edi Ramës, i cili ishte dhe mbeti aktori i vetëm që edhe meriton të përdhoset!

Po, Kodi i ri Penal thotë që ai i cili e përdhos Kryeministrin dënohet me burgim deri në tre vjet! Këta 100-200 mijë pijedashës të faesë me vetëm një togfjalësh i bashkohen Edi Ramës i cili është dhe kampion i përdhosjes së këtyre institucioneve!

Sa e zbatueshme do të jetë kjo shkelje e Nenit 235, këtë le ta mendojnë ekspertët e Edi Ramës ashtu siç e kanë menduar Nenin 866 – Përdhosja e kujtimit të vdekurit, për të mbrojtur kujtimin ndaj diktatorit Enver Hoxha, ose dhe Nenin 181 -Mundësia e lirimit me kusht për të dënuarin me burgim të përjetshëm, për të liruar vrasësin e simbolit të demokracisë, Azem Hajdari, pas 35 vjet heqje lirie ndërsa kanë kaluar tashmë 27 vjet!

Pas institucioneve shtetërore, normalisht që procesi zgjedhor si më i godituri në këtë shoqëri që nuk po bëhet dot demokratike do të jetë me interes për tu mbrojtur. Kur, nuk dihet, por ky Kod nuk e ka mendjen te shteti!

Pas zgjedhjeve të 11 Majit, të votosh më shumë se një herë do dënohesh 2-4 katër vjet burg, normalisht që do konsiderohet barcoletë, por meqë Neni287 – Votimi më shumë se një herë ose pa u identifikuar sipas Kodit të ri e meriton dhe një “Je suis Neni 287” sikur shteti i Edi Ramës të vazhdoj të gajaset, ashtu si dhe me Nenin 294 – Shpërdorimi i autoritetit policor, ndonëse nga vetë Kryeministri Rama policët u këshilluan të mbështesin partinë, ndëshkimi është deri në tre vjet burg!

Askujt nuk i sugjerohet të bëhet optimist në ekstrem edhe pasi ta ketë lexuar Nenin 293 – Përdorimi i funksionit publik për veprimtari politike ose zgjedhore, i cili parashikon burgim nga gjashtë muaj deri në dy vjet, por gjithsesi mund të reagoj në një ditë të caktuar të vitit me “Je suis Neni 293” të paktën duke sjellë në vëmendje Drejtoreshën e Agjencisë së Inovacionit dhe Ekselencës, Enkelejda Imeraj, e cila me një çantë plotë me para ose material zgjedhor, ia futi vrapit kur u kap nga syri i kameras, dhe sot vazhdon punën pa një të keqe!

Kështu, me Kodin e ri Penal, Diaspora shqiptare ka momentin e artë për ti kthyer përgjigje gjithë atij terrori shtetëror për zgjedhjet e 11 Majit me “Je suis Neni 664”. Kjo diasporë që në masën më të madhe ka braktisur atdheun nga përndjekja e Edi Ramës ose në gjuhën juridike të përkufizuar në Nenin 664 – Nxitja për emigrim, Kryeministrin aktual e dënon deri në katër vjet burgim!

A ka kush ta dënoj Kryeministrin Edi Rama në sistemin e sotëm të drejtësisë?! Natyrisht se jo, as birë nëne dhe as birë kurve, ndryshe do të dënoheshin edhe patronazhistët që terrorizuan Disaporën me familjarët e tyre duke i siguruar Ramës edhe fitoren mëm 11 Maj! Madje, me Kodin e ri Penal, sikur  të kishte ligj në këtë vend, patronazhistët do të rrezikoni që pjesën tjetër të jetës ta kalojnë në burg!

Por, kjo nuk do të thotë se të gjithë ata shqiptarë, të cilëve të dhënat u dolën sheshit dhe iu kërcënuan familjarët për 11 Maj, në një ditë të bukur duke rrufitur kafenë nuk mund ta shprehin një “Je suis Neni 266”, dhe të denoncojnë këtë bandë kriminale që, sipas këtij Kodi, përveç tre vjetëve në shkeljen e këtij neni – Mbledhja e të dhënave personale, i pret edhe dënimi 6-12 vjet për shkeljen e Nenit 267 – Përvetësimi, përpunimi dhe shpërndarja e paautorizuar e të dhënave!

Natyrisht që pas votës është prona që zë vendin kryesor dhe pas vuajtjes 80 vjeçare nuk mund të ngazëllehet një pronar që i është plaçkitur prona, se ai që i ka shkatërruar pronën do dënohet sipas Neni 908 – Shkatërrimi i pronës, deri në tre vjet burg.

Edhe pse Lali Eri është në burg për leckat e Ajolës, dhe nuk ke ndonjë shpresë se mund të dënohet sipas Nenit 909 – Shkatërrimi i rrugëve, ose dhe Nenit 910 – Shkatërrimi i rrjetit elektrik apo të ujësjellësit, që parashikon deri në dhjetë vjet dhe ishte specialiteti i tij, edhe me të qeshur në një mëngjes kafeje një denoncim “Je suis Neni 908”, në rastin më të mirë do të ishte reagim qytetar, sikur edhe askush të mos besoj se Ish-Kryetarja e Komisionit të Ligjeve, Klotilda Bushka, do të dënohen pse ndihmoi Lali Erin, me Nenin 495 – Pengimi i drejtësisë, me 1-5 vjet burgim.

Në fund, pjesa më vulnerabël e pjesës së shoqërisë që po pretendon ta ndërtoj demokracinë në këtë vend të pushtuar nga bandat e Edi Ramës, gazetarët, që vazhdojnë të marrin informacione nga sistemet bankare dhe prokurimet publike dhe nuk kanë arsye të besojnë se dikush që shkel Nenin 324 – Shkelja e barazisë së kandidatëve ekonomikë në procedurat e prokurimit publik, do dënohet me burgim 1-5 vjet, ose, Nenin 673 – Përdorimi i paautorizuar dhe përhapja e informacionit të privilegjuar ne sistemin bankar, nga tre deri ne shtate vjet; Ndonëse, me të drejtë janë të shqetësuar për Nenin 863 – Fyerja, Nenin 865 – Shpifja dhe Nenin 536 – Ndikimin në pavarësinë e gjykatës, të cilat regjimi mund t’i përdor për shantazhimin e çdo gazetari!

Por, kjo nuk do të thotë se duhet të heshtin! Me një “Je suis Neni 536” në rrjetet sociale ku mund të publikohen pjesë nga akuza e Erion Veliajt, shumë të dashura për qytetarin e këtij vendi dhe të gatshme të jepen nga Prokuroria, nuk ka shqiptar që mund ta besoj se mijëra gazetarë do të dënohen me nga tre vjet burg brenda një dite, si shkelës të Nenit 536!  

Që do të ketë gazetarë që do të kenë frikë ta luftojnë në këtë mënyrë padrejtësinë e Kryeministrit kjo nuk diskutohet, ndryshe nuk do të rrufisnin deri më sot kafe, por, ata nuk duhet ta harrojnë Nenin 852 – Shkelje e lirisë së mendimit dhe shprehjes, për të cilën mund të akuzohet vetë Edi Rama i cili në vitin e tij të 27 shkel këtë Nen duke mohuar dhe kufizuar padrejtësisht, lirinë e fjalës dhe shprehjes në publik, lirinë e shtypit apo të komunikimit, për të cilën shkelje Kodi i ri Penal ka parashikuar burgim deri në një vit.

Për të gjithë ata që për shkak të frikës nuk binden dot t’i thonë as një “jo” të voçkël Edi Ramës, bashkëshortja e Presidentit të e 32-të e SHBA, Eleanor Roosevelt, e ka thënë shumë kohë më parë, pse duhet të bësh atë që mendon se nuk mundesh:

“Ti fiton forcë, guxim dhe vetëbesim nga çdo përvojë në të cilën ngrihesh vërtet dhe e shikon frikën në fytyrë. Pastaj mund t’i thuash vetes: ‘E kam mbijetuar këtë tmerr, mund ta përballoj gjënë tjetër që më del përpara’… Duhet të bësh atë që mendon se nuk mundesh.”