Kongresmeni Self: I lumtur që takova Presidenten Osmani pas takimit të saj me Trump
Kongresmeni amerikan Keith Self ka bërë të ditur se Presidentja e Kosovës, Vjosa Osmani, është takuar me Presidentin amerikan Donald Trump, gjatë qëndrimit të saj në Shtetet e Bashkuara, takim pas të cilit edhe vetë Kongresmeni Self zhvilloi takim në New York me Presidenten Osmani.
“I jam mirënjohës presidentes së Kosovës, Osmanit, që kaloi kohë me mua dje pas takimeve të saj me presidentin Trump dhe anëtarët e Kombeve të Bashkuara,” u shpreh Kongresmeni Keith Self pas takimit, përmes rrjetit social Facebook.
Vizita e Presidentes së Kosovës, Vjosa Osmani, në SHBA përfshin takime të nivelit të lartë dhe diskutime me përfaqësues të Kombeve të Bashkuara dhe personalitete të tjera të politikës amerikane.
Ndërkohë, dje, Kongresmeni amerikan nga radhët e Partisë Republikane, Keith Self, ka zhvilluar një takim me Kryeministrin në detyrë të Kosovës, Albin Kurti, në Konsullatën e Republikës së Kosovës në New York.
“Kongresmeni Self është një mbështetës i zëshëm i Republikës së Kosovës. Bashkë diskutuan për marrëdhëniet bilaterale dhe bashkëpunimin ndërmjet Kosovës dhe Shteteve të Bashkuara të Amerikës, veçanërisht në fushën e mbrojtjes dhe sigurisë, dhe për rolin aktiv dhe kontributin e vazhdueshëm të diasporës shqiptare në SHBA,” thekson Zyra e Kryeministrit përmes një njoftimi duke shtuar se në takim Kurti e njoftoi Kongresmenin Self për investimet që janë bërë në ngritjen e kapaciteteve profesionale dhe operative të Forcës së Sigurisë së Kosovës, përfshirë këtu pajisjet dhe armatimin nga Shtetet e Bashkuara, si rezultat i drejtpërdrejtë i bashkëpunimit bilateral në mbrojtje.
Ndër të tjera, ai theksoi vendimet e qeverisë për pranimin dhe zhvendosjen e përkohshme nga SHBA-të të shtetasve të vendeve të treta dhe, së fundmi, heqjen e tarifës doganore ndaj të gjitha produkteve me origjinë nga SHBA, si dhe vazhdimin e programit Kompakt të Korporatës së Sfidave të Mijëvjeçarit për Kosovën nga administrata e re amerikane, si shprehje dhe dëshmi e partneritetit të besueshëm.
Gjatë takimit, gjithashtu u theksua roli dhe rëndësia e diasporës shqiptare në SHBA në forcimin e lidhjeve mes dy vendeve dhe shtimin e bashkëpunimit në sektorin privat përmes fasilitimit të investimeve të huaja direkte.
“Kryeministri e ftoi Kongresmenin Self për vizitë në Kosovë dhe e falënderoi atë për qëndrimet dhe përkrahjen publike të tij ndaj Kosovës dhe anëtarësimit të saj në NATO dhe struktura të tjera euroatlantike, teksa theksoi interesimin dhe gatishmërinë e Republikës së Kosovës dhe institucioneve të saj për bashkëpunim edhe më të afërt me miqtë tanë në Kongres dhe me qeverinë amerikane në promovimin e vlerave dhe interesave të përbashkëta të të dy vendeve,” thekson Zyra e Kryeministrit.
Ndërsa vetë Kongresmeni Sel pas takimit është shprehur përmes rrjetit social Facebook, se në takim me Kryeministrin në detyrë të Kosovë, Albin Kurti, ishte informuar rreth sfidave rajonale me të cilat përballet një nga aleatët më të fortë të Amerikës në rajonin e Ballkanit.
“Vizita e mëngjesit të sotëm me kryeministrin Kurti nga Kosova ka dhënë pasqyra mahnitëse rreth sfidave rajonale me të cilat përballet një nga aleatët më të fortë të Amerikës në rajonin e Ballkanit,” u shpreh pas takimit Kongresmeni amerikan, Keith Self.
Ndryshe, Kryeministri në detyrë, Albin Kurti, po qëndron në New York për takime në kuadër të Javës së Nivelit të Lartë të Sesionit të 80-të të Asamblesë së Përgjithshme të Kombeve të Bashkuara.
