Vrasja e biznesmenit italian Edoardo Sarchi në Tepelenë, pikëpyetje të shumta

Mister mbetet vrasja e biznesmenit italian Edoardo Sarchi, trupi i pajetë i të cilit është gjetur rreth orës 00:30 të ditës së sotme në fshatin Salari të Tepelenës.

44-vjeçari, i cili jetonte prej 20 vitesh në Tiranë dhe rezulton pronar i fabrikës së tullave “Tegola Edil Centro” në kryeqytet, raportohet se është qëlluar me armë.

Pranë trupit të pajetë të viktimës është gjetur edhe automjeti i tij. Fillimisht u raportua se ai shoqërohej nga persona të tjerë, por sipas informacioneve në momentin kur u zbulua trupi ishte i vetëm dhe deri më tani s’ka asnjë të shoqëruar nga policia.

Rrethanat e ngjarjes mbeten ende të paqarta duke ngritur pikëpyetje lidhur me rrethanat, si edhe arsyet e krimit, ndërsa deri më tani nuk përjashtohet asnjë pistë.

Edoardo Sarchi rezulton të ketë qenë frekuentues i rregullt i zonës së Tepelenës për qëllime gjuetie.

Edhe mbrëmjen e së premtes dyshohet se kishte udhëtuar drejt fshatit Salari për gjah.

Dyshohet se në vendngjarje mund të kenë qenë dy automjete, përfshirë një tjetër me miq të tij, raporton Panorama. Por ende nuk dihet nëse ata kanë qenë realisht prezentë dhe përse nuk qëndruan në vendngjarje, nëse ishin.

Njoftimi i policisë:

Tepelenë/Informacion paraprak

Rreth orës 00:30, në fshatin Salari, në vendin e quajtur “Dilan”, në rrugë është gjetur pa shenja jete shtetasi italian E. S., 44 vjeç, banues në Tiranë, i cili dyshohet se është vrarë me armë zjarri.

Shërbimet e Policisë, me marrjen e njoftimit, shkuan menjëherë në vendin e ngjarjes.

Është ngritur një grup i posaçëm hetimor, i cili, nën drejtimin e Prokurorisë, po punon intensivisht për sqarimin e rrethanave, dokumentimin ligjor, si dhe për identifikimin dhe kapjen e autorit/ëve.

Ndërkohë, shërbimet e Policisë, në bashkëpunim me Drejtorinë Vendore të Policisë Fier dhe Vlorë, po ushtrojnë kontrolle në zonë dhe ambiente të ndryshme, për kapjen e autorit/ëve.