Prodhimi i naftës në SHBA thyen përsëri rekorde

Prodhimi i naftës në SHBA pritet të arrijë një rekord të ri këtë vit, tha Ministria e Energjisë, me rënien në vitin 2026 që pritet të jetë më pak e rëndë se sa pritej më parë.

Kompanitë amerikane pritet të prodhojnë mesatarisht 13.53 milionë fuçi naftë në ditë këtë vit, ishte përllogaritja e Departamentit të Statistikave pranë Ministrisë së Energjisë, EIA.

Çfarë tregon vlerësimi i ri?

Deri më tani, ata kishin pritur një prodhim mesatar ditor prej 13.44 milionë fuçish në ditë. Vlerësimi i ri tregon se prodhimi këtë vit do të arrijë një nivel të ri rekord që kur departamenti i statistikave ka publikuar të dhënat dhe do të jetë 2.2 për qind më i lartë se vitin e kaluar.

Për vitin 2026, statistikanët tani parashikojnë vetëm një rënie të vogël të prodhimit, prej 0.1 për qind, në 13.51 milionë fuçish në ditë, sipas një raporti të perspektivës afatshkurtër për sektorin e energjisë. Deri më tani, ata prisnin që ai të ulej me më shumë se një përqind.

Furnizimet duhet të rriten në vitin 2026 dhe të ndikojnë në çmime në muajt në vijim. Çmimi mesatar i naftës bruto në tregun amerikan duhet të jetë rreth 65 dollarë për fuçi këtë vit, vlerëson agjencia, që do të thotë se nafta do të jetë 15 për qind më e lirë se vitin e kaluar.

Prodhimi botëror po rritet gjithashtu

Sipas llogaritjeve të statistikanëve amerikanë, çmimi mesatar i naftës bruto në tregun e Londrës duhet të ulet me pothuajse të njëjtën përqindje, në rreth 68.64 dollarë për fuçi. Prodhimi botëror i naftës gjithashtu duhet të rritet më fuqishëm sesa kishte pritur EIA deri më tani, kryesisht falë prodhuesve të pavarur.

Statistikanët amerikanë kanë konfirmuar pak a shumë vlerësimet e prodhimit të anëtarëve të Organizatës së Vendeve Eksportuese të Naftës, OPEC, dhe aleatëve të tyre, pavarësisht njoftimeve të grupit se synon të vendosë më shumë fuçi në treg.

“Rritja e fundit e prodhimit për shkak të rritjes së prodhimit të synuar të OPEC+ do të dobësohet ndërsa disa anëtarë arrijnë kufijtë praktikë të prodhimit dhe të tjerët kërkojnë të parandalojnë një rritje shumë të shpejtë të furnizimeve për të kufizuar rëniet e mëtejshme të çmimeve të naftës”, shpjegojnë statistikanët amerikanë.