Jabllanoviç: S’kemi frikë nga shqiptarët, por nga Beogradi

Partia e Serbëve të Kosovës i është drejtuar presidentit të Serbisë, Aleksandar Vuçiç, me një letër të hapur, të cilën e ka siguruar Agjencia e lajmeve Kosovapress.

Në të, ndër të tjera thuhet se “inteligjenca dhe Kisha Ortodokse Serbe në Kosovë është nën sulmin e Vuçiçit”.

“Ne nuk kemi frikë nga shqiptarët e as nga KFOR-i, por fatkeqësisht nga Beogradi”, thuhet ndër të tjera në këtë letër.

PSK-së, kryetar i së cilës është ish-kryetari i Listës Serbe dhe ministër në qeverisnë e Kosovës, Aleksandar Jabllanoviç, përmend edhe fakte të tjera që, sipas kësaj partie, i kanë dëmtuar serbët e Kosovës, ndër to manipulimi i votave, duke thënë se “kanë votuar edhe njerëzit e vdekur” gjatë zgjedhjeve të fundit.

Në fund të letrës, PSK ia përmend Vuçiçit faktin se mediat e tij në Serbi në vazhdimësi i anatemojnë kundërshtarët e tij politikë në Kosovë.