Berisha: Seanca u mbyll sapo denoncova Arubën! Mazhoranca voton Raportet e 4 institucioneve!

Një asgjësim të Parlamentit të Kosovës e ka konsideruar Kryetari i Partisë Demokratike, Sali Berisha, atë që ndodhi në seancën e sotme në Parlament. Në një deklaratë për mediat jashtë sallës së seancës plenare, pas tensioneve që shoqëruan debatet, Berisha theksoi se punimet u mbyllën vetëm pasi ai denoncoi çështjen e Arubës dhe refuzimin e Kryeministrit Rama dhe ministrave të tij për të dhënë llogari në lidhje me takimin e zhvilluar në ishull me kartelet e drogës.

“Nuk kishte asnjë lloj, përkundrazi insistuam në një të drejtë kushtetuese të deputetëve. Ky është parlament që nuk duhet të ekzistojë asnjë ditë,” tha Sali Berisha duke shtuar se tashmë është e dokumentuar dhe e provuar se Kryeministri Edi Rama mban kontakte me kartelet e drogës.

“Ngrihet pa asnjë përgjegjësi ai. Merr urdhër nga Edi Rama, sa iu përmend Edi Ramës Luftar Hysi, sa u përmend Aruba, sa u përmend ai që i thoshte ‘i gjati’, e me radhë, mbylle i thotë,” tha Kryetari i Partisë Demokratike, Sali Berisha.

Pas kësaj situate të krijuar, mes tensioneve mazhoranca kaloi në votim pa debat Raportet e 4 institucioneve, duke përsëritur veprimin me miratimin e Planit të Qeverisë pa debat:

– Raportin e veprimtarisë së Autoritetit të Komunikimeve Elektronike dhe Postare (AKEP) për vitin 2024.

– Raportin e veprimtarisë së Komisionerit për të Drejtën e Informimit dhe Mbrojtjen e të Dhënave Personale (KDIMDP) për vitin 2024.

– Raportin e veprimtarisë vjetore të Entit Rregullator të Energjisë, ERE, për vitin 2024.

– Raportin e vjetor i veprimtarisë së Entit Rregullator të Ujit, ERRU, për vitin 2024.

Fjala e plotë:

Ky është Pelesh-parlamenti, unik në historinë e tij.

E turpshme.

Këta kanë frikë dhe tmerr dhe votojnë me shpejtësi të rrufeshme.

I vetmi moment që ndodhi ishte se unë denoncova refuzimin e Edi Ramës për Arubën, ministrat që kanë qenë në Aruba, rikujtova pritjen që i ka bërë Sinaloas së Meksikës.

Dhe këto fjalë, sikur të ishin thika apo bajoneta, detyruan Peleshin të mbyllë parlamentin.

Ky është de facto asgjësimi i parlamentit.

Në qoftë se parlamenti trajtohet në këtë mënyrë…

Nuk kishte asnjë lloj, përkundrazi insistuam në një të drejtë kushtetuese të deputetëve.

Dhe ky, 10 orë debate të parashikuara në rregullore, mbylli parlamentin dhe ikin.

Ky është parlament që nuk duhet të ekzistojë asnjë ditë.

Pyetje: Çfarë mund të keni ju ndaj këtij Parlamenti? Do të vazhdoni me këto seanca?

Sali Berisha: Ne do vazhdojmë. Ne kemi vepruar absolutisht në përputhje të plotë me rregulloren.

Zotëria tha se unë do i jap fjalën vetëm zotit Berisha dhe më dha fjalën.

Në procedurën time denoncova refuzimin e interpelancës nga kryeministri, për një çështje të cilën nuk ekziston, ka vetëm Maduro i Venezuelës është i akuzuar se mban kontakte me kartelet e drogës.

Dhe Edi Rama është i provuar se mban kontakte me kartelet e drogës.

A nuk është ky një problem madhor për vendin?

Ky është një problem madhor jo për vendin, por për rajonin, për Europën, kur një kryeministër mban kontakte me kartelet e drogës.

Kjo është. Në këtë mënyrë ata mendojnë se mund t’i fshehin, por nuk fshihen në këtë mënyrë…

Pyetje: Berisha, çfarë do të ndodhë në vazhdim, në kushtet kur mazhoranca e ka treguar qartë vullnetin për këtë 4-vjeçar, do të bëjë seanca 10-minutëshe dhe kështu do të vazhdohet. Cila duhet të jetë sjellja juaj? Ata do të votojnë dhe ju do të insistoni?

Sali Berisha:  Absolutisht ne do insistojmë të mbrojmë Kushtetutën dhe rregulloren e parlamentit. Edhe ne pastaj do të ju japim përgjigje.

Ne në atë sallë insistojmë në zbatimin e Kushtetutës dhe rregullores së parlamenti.

Pyetje: Rrethimi i Parlamentit, kur do të ndodhë, z. Berisha?

Sali Berisha: Problemi është sepse ky parlament në ditën e zezë si kjo legjislaturë nuk ka qenë kurrë.

Ngrihet pa asnjë përgjegjësi ai. Merr urdhër nga Edi Rama, sa iu përmend Edi Ramës Luftar Hysi, sa u përmend Aruba, sa u përmend ai që i thoshte ‘i gjati’, e me radhë, mbylle i thotë.

Por Edi Rama nuk mund të shpëtojë nga këto.