Shpallet fituesi i Çmimit Nobel për Letërsi

Shkrimtari hungarez Laszlo Krasznahorkai është fitues i Çmimit Nobel në Letërsi, bëri të ditur sot Komiteti i Nobelit.

I lindur në vitin 1954 në Gyula të Hungarisë, Krasznahorkai është një nga shkrimtarët më të rëndësishëm bashkëkohorë evropianë, i njohur për fjalitë e tij të dendura, hipnotike dhe vizionet e errëta të një bote në prag të shembjes.

Një traditë nga Kafka te Bernhard
Ai është trashëgimtar i një tradite letrare të Evropës Qendrore që shtrihet nga Kafka te Thomas Bernhard dhe karakterizohet nga absurditeti dhe ekzagjerimi grotesk.

Veprat e tij, të tilla si romanet “Satantango” dhe “Melankolia e Rezistencës”, eksplorojnë kaosin moral, shembjen e qytetërimit dhe obsesionin njerëzor me kuptimin, shumë prej të cilave u adaptuan për film nga regjisori Bela Tarr.

Nesër pritet të shpallet Çmimi për Paqe, i cili ndahet në një ceremoni të veçantë në Oslo.

Çmimet për shkencë, letërsi dhe ekonomi iu dorëzohen laureatëve nga mbreti suedez në një ceremoni në Stokholm më 10 dhjetor, në përvjetorin e vdekjes së Alfred Nobelit.