Serbia kërkon luftë, autoritetet e Vuçiçit sulmojnë ushtrinë serbe dhe akuzojnë shqiptarët!
Serbia i kthehet skenareve të viteve ’80 të shekullit të kaluar kur vetë sulmonte policinë dhe ushtrinë, dhe, akuzonte, vriste e arrestonte shqiptarët për këto sulme!
Madje skenari i sulmit të djeshëm ishte shumë më primitiv ndonëse ishte ideuar nga e njejta kokë, UDB!
“Shqiptarët e maskuar sulmuan dje me 15 të shtëna rreth orës 15:00 në rajonin e Bazës Ushtarake të Serbisë ‘Debela glava’, pjesëtarët e Ushtrisë së Serbisë dhe u larguan në drejtim të Kosovës me gjashtë xhipa,” theksojnë autoritetet e Aleksandar Vuçiçit edhe në vitin 2025, pa sqaruar se nga e dinë që janë shqiptarë kur ishin të maskuar, dhe kush janë ata të çmendur që me gjashtë xhipa sulmojnë me 15 të shtëna atë bazë ushtarake serbe ku zyrtarisht janë mbi 1.300 ushtarë!
Në fund, e keqja më e madhe është që këtë njoftim të disa rreshtave të ideuar nga Zyra e Propagandës së Vuçiçit e raportuan të gjitha mediat, shumica prej të cilave nuk raportojnë për protestën qytetare që tashmë po zhvillohet mbi një vit rrugëve të kryeqytetit dhe jo vetëm.
Gjithësesi, Policia e Kosovës duke reaguar ndaj pretendimeve të autoriteteve dhe mediave shtetërore serbe, sipas të cilave shqiptarët kanë hapur zjarr ndaj ushtrisë serbe, i cilëson si të pabazuara, të pasakta dhe pjesë e një fushate dezinformuese që synon krijimin e tensioneve të panevojshme në zonën kufitare.
“Sipas të gjitha të dhënave operative, raportimeve nga njësitë policore dhe koordinimit me institucionet kompetente, nuk është regjistruar asnjë incident i natyrës së pretenduar. Policia u bën thirrje autoriteteve serbe të ndalojnë përhapjen e informacioneve të rreme, të cilat vetëm sa dëmtojnë sigurinë publike dhe krijojnë perceptime të rreme në opinion”, thuhet në reagimin e Policisë së Kosovës duke siguruar qytetarët se situata në zonën kufitare mbetet e qetë, stabël dhe plotësisht nën kontroll, ndërsa institucionet e sigurisë vazhdojnë të jenë të angazhuara për ruajtjen e rendit dhe sigurisë në çdo pjesë të territorit të vendit ndërsa përfundon:
“Policia e Republikës së Kosovës u bën thirrje mediave që të referohen vetëm te burimet e verifikuara dhe të shmangin publikimin e informacionit të pakonfirmuar, i cili mund të ndikojë negativisht në rendin dhe sigurinë publike. Policia mbetet e përkushtuar në garantimin e sigurisë së përgjithshme, zbatimin e ligjit dhe ruajtjen e rendit publik për të gjithë qytetarët e Republikës së Kosovës.”
