“Dita e Forcës”, Presidentja e Kosovës: Jemi krenar me FSK-në, garancë për sovranitetin tonë
Duke e cilësuar ditë krenarie Ditën e Forcës së Sigurisë së Kosovës, si institucion pasardhëse i UÇK-së, Presidentja Vjosa Osmani vlerësoi se Ushtria e Kosovës çdo ditë po bëhet më ndërvepruese dhe profesionale.
“Ushtria jonë çdo ditë po përforcohet dhe po bëhet më operacionale, ndërvepruese e profesionale. Jemi jashtëzakonisht krenar me punën e tyre. Ata janë garanca më e fuqishme së bashku me Policinë e Kosovës dhe institucionet e tjera të sigurisë për sovranitetin tonë, integritetin territorial e mbrojtjen shtetërore e të çdo qytetari tonë,” tha Presodentja e Kosovës, Vjosa Osmani, ndërsa Kryeministri në detyrë, Albin Kurti, foli për investimin prej mbi 430 milionë eurove në pajisje e armatim për FSK-në gjatë katër viteve të fundit.
“Ky institucion më herët ka qenë i pajisur më dobët se Policia e Kosovës. Ndërkaq tani është e pajisur me teknologjike moderne e kjo sa vije e shtohet, tashmë kemi më shumë se dyfishim të çizmeve në tokë por gjithashtu të syve në qiell, kjo për shkak se kemi pajisur FSK-në me dronë ‘Sky Tech’ dhe ‘TB2 Bayraktar’ nga Turqia, ‘Puma’ nga SHBA dhe së shpejti do ta kemi edhe fabrikën e municionet dhe prodhimin e dronëve të prodhuara nga Kosova,” tha Albin Kurti duke vlerësuar se me FSK-në, këtë ushtri të pajisur kaq mirë, brezat e rinj do të jenë të sigurtë të jetojnë në paqe dhe të lulëzojnë ndërsa përfundoi:
“Në njërën anë kemi sakrificën e dëshmorëve të kombit, mbi të gjitha atë të Adem Jasharit dhe familjes së tij, veteranët e invalidët e UÇK-së e në anën tjetër i kemi të gjithë këta fëmijë që kanë ardhur të shohin ushtrinë e tyre”, ka thënë ai.
Ndërkohë Kryetari i Parlamentit, Dimal Basha, shtoi se trashëgimia që mbart në veti FSK buron nga UÇK.
“FSK mbetet institucioni më i besueshëm në vend dhe kjo për shkak të një pune të shkëlqyer dhe përkushtimit të tyre për sigurinë në vendin tonë”, ka thënë ai.
Ndryshe, përveç Presidentes Vjosa Osmani, Kryetarit të Parlamentit, Dimal Basha, Kryeministrit në detyrë, Albn Kurti, ministrit në detyrë të Mbrojtjes, Ejup Maqedonci, dhe figurave tjera publike, sot me rastin e “Ditës së Forcës”, mijëra qytetarë janë njohur në kazermën kryesore të Forcës së Sigurisë së Kosovës, “Adem Jashari”, si dhe kazermat në Mitrovicë, Prizren, Pomozotin, Istog, Ferizaj dhe Gjilan, me kapacitetet e FSK-së.
