Amerikoni zbulon sundimtarin shqiptar me mendje të ligë!
nga Agim Popoci
Derisa komunistët shqiptarë ishin në pritje të informacionit mbi llojin e bombave amerikane me të cilat pritet të komunikoj lideri i tyre shpirtëror, Edi Rama u shfaq, dhe, zhgënjeu! Rrezikun e lirisë, nuk po e kërkon më te bombat amerikane, por, mërmëritjet e tij kishin të bënin me gërmimet nga qitapët e Amerikës! Pse?!
Pas impresioneve që shprehu për figurën monumentale, ose siç u shpreh Edi Rama,
njërit nga mendjet më të ndritura që ka njohur drejtësia demokratike, Robert H. Jackson, jo prodhues i ndonjë bombe amerikane ose ekspert predikimi, por, Prokuror i Përgjithshëm i Shteteve të Bashkuara, gjyqtar i Gjykatës Supreme dhe arkitekt i akuzës në gjyqin epokal të Nurembergut, Kryeministri Rama vjen pas dhjetë ditësh sërish me një legjendar të tij të Gjykatës Supreme të Amerikës, Louis Brandeis, i cili flet për kërcënimin që i vjen lirisë nga shkeljet në emër të drejtësisë, por, sërish, asgjëkundi bomba e aq më pak predikime!
Duke i futur në kaos gjithë këto mendime juridike, shoqëruar me intervistën për “Die Presse” për bombat amerikane, pa e thënë as edhe një fjalë për 50 milionë eurot e tunelit të Llogarasë që u avulluan nga duart e Belinda Ballukut, të cilat i denoncoi Zv/Kryeministri i tij Arben Ahmetaj dhe i konfirmoi krijesa e tij SPAK, Edi Rama filloi të ekzaltohet sapo e krijoi idenë se ia arriti qëllimit, pasi mediat filluan të flasin vetëm për arsyet pse Gjykata Kushtetuese duhet ta kthejë Zv/Kryeministren e tij aktuale në detyrë!
“Pushteti nuk ka qenë kurrë më i denjë sesa në çastin kur ka pranuar t’i nënshtrohet gjykimit të një drejtësie të pavarur,” ishte impresioni i Edi Ramës nga Robert H. Jackson që e ndau me shqiptarët në Ditën e Alfabetit, jo që kishte lidhje me ndonjë gjuhë, aq më pak me gjuhën shqipe, por, thjeshtë ishte një copëz e fushatës që filloi Kryeministri kundër SPAK-ut, pse guxoj dhe i trokiti në derën e qeverisë së tij; Bombë kjo që e rrëzoi trimin me sëpatë që ishin mësuar ta shohin vëllezërit e tij të gjakut komunist, dhe, nuk po ju tregonte njeri se nga po i vinte!
Dhe, pavarësisht se e ndau me komunistët e tij të dashur, fjalimin historik të Robert H. Jacksonit, sepse, siç thotë vetë, paralajmërimet e kryeprokurorit legjendar të Amerikës, njeriut që shkroi etikën moderne të prokurorit demokratik, tingëllojnë sot si të shkruara për ne, siç duket Edi Rama nuk e ka kuptuar të madhin Jackson.
Sepse, thjeshtë, sikur ta kishte kuptuar, nuk i ishte drejtuar Gjykatës Kushtetuese për të kërkuar anulimin e vendimit të GJKKO për pezullimin nga detyra të Zv/Kryeministres dhe ministres së Infrastrukturës dhe Energjisë, dhe nuk do të hidhte gjithë atë baltë mbi sistemin e drejtësisë që krijoi me doçkat e tij kriminale, në veçanti me SPAK-un që aq shumë mburrej!
“Përmbysja nga një gjykatë më e lartë nuk është provë se drejtësia në këtë mënyrë bëhet më mirë,” e thotë edhe këtë i madhi Robert H. Jackson përveç fjalimit historik, sikur ta dinte se Edi Rama do ti drejtohej një Gjykate më të lartë se GJKKO, dhe, tashmë është e qartë se edhe në rast se Gjykata Kushtetuese i jep të drejtë, kjo nuk do të thotë se drejtësia do bëhet më e mirë; Sepse, është po ai pisllëk që e krijoi vetë!
Dhe, këtë pisllëk, Edi Rama po mundohet ta pastroj jo duke vënë drejtësinë në vend, por sërish duke marrë sëpatën si në ditët e para kur hyri në politikë, dhe të heq e vendos pengesa vetëm aty ku atij ia merr mendja!
Përveç se iu drejtua Gjykatës Kushtetuese për ta kthyer Belinda Ballukun në punë, Edi Rama filloi të flas edhe për Shqipërinë demokratike që mund të bëhet vetëm me Bashkimin Evropian, sepse, siç tha për të përditshmen austriake “Die Presse”, Amerikanët e kanë filozofinë e rregullimit të gjërave me bomba dhe pastaj me predikime!
Po, janë këto akuza pikërisht nga Edi Rama që i vuri në emër të Amerikës non-gratën Saliut, kërcënoi dynjanë me hyzmeqarin e tij në FBI, Charles McGonigal, që kishte pajtuar Sigurimi i Shtetit, dhe, detyroi kërmat e tij të kuq të shporrin edhe Nënën e tyre nga kënga popullore, duke kënduar: E para është Amerika, e dyta je ti!
Por, Amerika pa George Soros ndryshoi shumëçka jo vetëm në mendësinë politike të Edi Ramës ku pa Yuri Kim, SPAK-u nuk është më krijesë e Kryeministrit Rama, por edhe të gjithë atyre patronazhistëve që e kanë krijuar idenë se Droga është Paraja, dhe Paraja e blenë gjithë Botën!
Jo, jo, nuk është, dhe këtë mentalitet të krijuar ndër komunistët shqiptarë, Presidenti amerikan Donald Trump e fiku me një mesazh në rrjetet sociale, duke i bërë të qartë jo vetëm Edi Ramës së Venezuelës, por, gjithë linjave ajrore, pilotëve, kontrabandistëve të drogës dhe trafikantëve të qenieve njerëzore, se pas ndalimit të lëvizjes në tokë dhe det, as qielli më nuk është i tyre, dhe, e kanë të ndaluar të fluturojnë!
Në panik e sipër ndërsa i ka orët e numëruara, Edi Rama duke shfletuar qitapët amerikanë e mendon shpëtimin te Gjykata Kushtetuese, tashmë jo më për tu krekosur por për të thënë para atyre që nuk bashkëbisedojnë me Narkoshtet, se sa qelibar që është si ai ashtu dhe asqeria e tij Belinda Balluku!
Për këtë qëllim gjeti fijen e kashtës, por mendësia enveriste nuk e la pa e redaktuar, para se ta bëjë gati për shitje një thënie nga të shumtat të Louis Brandeis mbi demokracinë, lirinë dhe ligjin.
“Rreziqet më të mëdha për lirinë vijnë nga individët e zellshëm qëllimmirë, që nuk kuptojnë atë që bëjnë” kështu shkroi Louis Brandeis, anëtari legjendar i Gjykatës Supreme të Amerikës më vitet 1916-1939) – në tekstin e famshëm për kërcënimin që i vjen lirisë nga shkeljet në emër të drejtësisë, thotë Edi Rama ndërsa kishte filluar numërimi mbrapsht i Gjykatës Kushtetuese nën hijen e Presidentit të Venezuelës, Nicolás Maduro, që tashmë ka marrë fund.
Por, meqë jo të gjithë shqipfolësit në këtë tokë janë dele nga Asambleja e Partisë Socialiste, kryetari i tyre Edi Rama duhet ta dijë se thënia e tij e redaktuar me ligësi, jo vetëm që është shkëputur nga një deklaratë epike e Louis D. Brandeis në çështjen e vitit 1928 “Olmstead kundër SHBA-së, 277 U.S. 438” që sot është e njohur jo vetëm në jurisprudencën amerikane, por kemi të bëjmë me një deklaratë që i mëson edhe shqiptarët se njerëzit e lindur për liri janë natyrshëm të vëmendshëm për të zmbrapsur sundimtarët me mendje të liga:
“Përvoja duhet të na mësojë të jemi sa më vigjilentë për të mbrojtur lirinë kur qëllimet e qeverisë janë bamirëse.
Njerëzit e lindur për liri janë natyrshëm të vëmendshëm për të zmbrapsur pushtimin e lirisë së tyre nga sundimtarët me mendje të liga.
Rreziqet më të mëdha për lirinë fshihen në shkeljen tinëzare të njerëzve me zell, me qëllime të mira, por pa kuptim.”
Në fund, Edi Rama mund të vazhdoj ta cilësoj, legjendari Louis Brandeis, edhe pasi Gjykata Kushtetuese ta thotë fjalën e vetë ashtu siç e mendon Kryeministri Rama ose jo, por duhet ti lë manipulimet me deklarata të Amerikonëve, dhe, ta ketë të qartë se mund ti ndodhë ashtu siç e ka thënë mendjendrituri Louis Brandeis:
“Nëse qeveria bëhet shkelëse e ligjit, ajo ngjall përbuzje për ligjin; ajo fton çdo njeri të bëhet ligj më vete, ajo fton anarkinë”.
