“Përplasja e parimorëve”, Shehaj: Taulant po i bënë nder Ballukut! Balla: S’bëhesh politikan duke paguar o Agron!
Edhe seanca e sotme plenare në Parlament ka kaluar me tensione, denoncime dhe akuza mes deputetëve ku ka spikatur ajo mes liderit të partisë “Mundësia”, Agron Shehaj, dhe, Kryetarit të Grupit Parlamentar të PS, Taulant Balla, ku në pamje të parë krijohej përshtypja se kemi të bëjmë mes dy politikanëve parimorë ndonëse dihet që të dy janë në po të njejtin nivel ndonëse nga përplasja rezulton se vetëm shefat u ndryshojnë.
“Dolën përgjime për Belinda Ballukun, 1,3 mld euro, për Thumanë-Kashar e kam fjalën. Ju zgjodhët t’i bëni nderin e jetës. Zgjodhët t’i bëni nderin e jetës një oligarku. Më kë jeni ju, zgjidhni oligarkun, abuzuesit dhe jo qytetarët, sepse abuzoni bashkë. Nuk besoj ti Taulant, se e vërteta është që ngrihesh në mëngjes dhe thuaj do i bëj nder atij, por e vërteta është se ju jeni bashkë, zgjidhni dikë me të cilin ndani paratë, ky është nderi që bëni, zgjidhni atë si ortakë. Në të vërtetë nderin ia bëni vetes tuaj. Pse e bëni? Sepse keni kapur drejtësinë, deri dje e kishit nën kontroll,” tha kreu partisë “Mundësia” i cili vetëm Edi Ramën vazhdon të mos e akuzoj por të gjithë të tjerët ndërsa shtoi:
“Për ju ishte e paimagjinueshme që kryetari i bashkisë së Tiranës të merrej e të mbyllej në burg. Për ju ishte e paimagjinueshme që SPAK të vij këtu e t’ju kërkojë arrestimin e zv/kryeministres, ndaj ju doni ta bllokoni”.
Taulant Balla që siç duket e njeh mirë të kaluarën e biznesmenit të cilin e ka thirrë banka londineze ti tërheqë paratë pasi u bë deputet, i kujtoi Agron Shehajt blerjen e mandatit të deputetit në vitin 2017, duke iu referuar Ish-Kryetarit të PD, Lulzim Basha, ndërsa i kujtoi edhe kohën kur Erion Veliaj si Ministër e vizitonte te biznesi i tij.
“Si the ti, si thonte Erioni për ty Veliaj, histori suksesi, na erdhi Goni, na erdhi Goni, ka ardhur këtu, na ka sjellë modelin. Nuk po shpik, po i referohem lajmeve publike të një vizite që ministri i Mirëqenies Sociale ka bërë në biznesin e një sipërmarrësi që kishte ardhur e po investonte dhe ministria po e mbështeste.
Shiko, burrëria nuk është kusht që vetëm të veshësh pantallona, se mund të veshës edhe pantallona, por prapë ti, për fatin e keq, ashtu siç ke hyrë në këtë sallë në vitin 2017, ta kam thënë shpesh, se ma kanë thënë ata që të sollën këtu, se si erdhe,” tha kreu i Grupit Parlamentar të PS, Taulant Balla, duke i kujtuar llojin e politikanit që është, paguan më shumë lekë:
“Nuk bëhesh dot politikan duke paguar para o Agron për të hyrë deputet dhe duke bërë boost-a e postime në Facebook, je politikani që paguan më shumë lekë për share në Facebok. Lekë gjaku, o aman, ngele duke paguar lekët aty, je politikani që paguan më shumë lekë. Ti s’ke faj se ti lekë gjaku i ke, se je i vetmi që paguhesh me lekë nga buxheti i shtetit.”
