Krime lufte në Malishevë, Srgjan Lazoviç dënohet me 12.5 vjet burg

Gjykata Themelore në Prishtinë e ka shpallur sot fajtor Srgjan Lazoviçin për krime lufte kundër popullsisë civile dhe e ka dënuar me 12 vjet e 6 muaj burg.

Zëdhënësja e Gjykatës Themelore në Prishtinë, Mirlinda Gashi, ka konfirmuar se vendimi është shpallur sot dhe se i akuzuari është dënuar për veprën penale të krimeve të luftës kundër civilëve.

Ndryshe në aktakuzë thuhet se nga data 3 shtator 1998 deri më 5 shtator 1998, në fshatin Panorc, Komuna Malishevë, me dashje, i armatosur, i uniformuar, në bashkëkryerje me pjesëtarë të tjerë të forcave policore dhe ushtarake serbe, me qëllim të frikësimit, dëbimit masiv dhe spastrimit etnik të popullatës shqiptare, Lazoviç ka arrestuar, ndaluar, torturuar, maltretuar fizikisht dhe psiqikisht, rreth 500 qytetarë civilë, të cilët nuk ishin të përfshirë në konflikt.