Zbatim kriminal i urdhrave të Edi Ramës, Berisha: Gjykata Kushtetuese, strofulla e fundit e hajdutëve!

Duke vlerësuar situatën aktuale si degradimin më të thellë institucional që ka njohur vendi, Kryetari i Partisë Demokratike, Sali Berisha, e akuzoi Gjykatën Kushtetuese se ka humbur çdo rol kushtetues dhe moral, duke zbatuar në mënyrë kriminale urdhrat e Edi Ramës.

“Në një akt ekstrem vetëposhtërimi, ata të cilët Kushtetuta i përcakton si garantë të saj dhe i ka vendosur në piedestalin më të lartë të piramidës së pushtetit gjyqësor, ata po faktojnë para syve tuaj se janë strofulla e fundit e hajdutëve të narkoshtetit,” tha Sali Berisha duke theksuar se për tre herë me radhë ajo gjykatë firmosi turpin e saj.

“Ajo gjykatë dëshmoi se para ligjit, para interesit të një populli të tërë, para interesit të qindra mijëra fëmijëve shqiptarë, që sipas të gjitha statistikave nuk ushqehen dot si duhet, para interesit të miliona shqiptarëve që braktisin vendin e tyre sepse u shkatërrohen vendet e punës, para interesit të mijëra të sëmurëve që nuk marrin dot ilaçet e tyre sepse u vidhen paratë e ilaçeve nga zyrtarët që këta mbrojnë, por edhe para dinjitetit të vendit, këta janë turpi i vendit, turpi i kombit.”

Në fund, duke ju drejtuar qytetarëve, Kryetari i Partisë Demokratike, Sali Berisha, tha se janë shpresa e fundit dhe e vetme e këtij vendi ndërsa përfundoi:

“Prandaj të vazhdojmë me vendosmërinë më absolute gjer në triumfin e moralit, e të drejtës, e legjitimitetit, e dinjitetit të qytetarëve, interesit të tyre dhe të Shqipërisë!”

Fjala e plotë:

Të dashur qytetare dhe qytetarë, dita e djeshme faktoi para secilit prej jush, para të gjithë shqiptarëve, para komunitetit ndërkombëtar dhe mbarë botës se Gjykata Kushtetuese e Shqipërisë është strofulla e fundit e hajdutëve tuaj.

Në një akt ekstrem vetëposhtërimi, ata të cilët Kushtetuta i përcakton si garantë të saj dhe i ka vendosur në piedestalin më të lartë të piramidës së pushtetit gjyqësor, ata po faktojnë para syve tuaj se janë strofulla e fundit e hajdutëve të narkoshtetit.

Ata zotërinj dhe zonja, natyrisht jo të gjithë, se këtu nuk mund të mos vlerësoj qëndrime korrekte të ndonjërit prej tyre, dëshmojnë se janë të gatshëm jo të mbrojnë ligjin, Kushtetutën dhe interesat tuaja, por të shkelmojnë mbi ligjin, Kushtetutën dhe dinjitetin, moralin e vet.

Vetëm e vetëm për të zbatuar përulësisht, për të zbatuar në mënyrën më kriminale urdhrat e Edi Ramës.

Kësaj here nuk kam pyetur se cili apo cila kërkoi zgjatjen. Jo. Kjo ishte e treta herë.

Tre herë me radhë ajo gjykatë firmosi turpin e saj.

Ajo gjykatë dëshmoi se para ligjit, para interesit të një populli të tërë, para interesit të qindra mijëra fëmijëve shqiptarë, që sipas të gjitha statistikave nuk ushqehen dot si duhet, para interesit të miliona shqiptarëve që braktisin vendin e tyre sepse u shkatërrohen vendet e punës, para interesit të mijëra të sëmurëve që nuk marrin dot ilaçet e tyre sepse u vidhen paratë e ilaçeve nga zyrtarët që këta mbrojnë, por edhe para dinjitetit të vendit, këta janë turpi i vendit, turpi i kombit.

Këta e bëjnë Shqipërinë hore para gjithë botës me gjithë këto qëndrime.

Këta e bëjnë Shqipërinë një shtet hor, zuzar, që nuk ka as ligj dhe as Kushtetutë, dhe e bëjnë vetëm për interesa personale.

Kemi të bëjmë me një degradim të shkallës më të thellë që mund të ekzistojë.

Me ambiguitetin e tyre tregojnë se sa të pakarakter dhe të pafytyrë janë.

Se çfarë turp njerëzish përfaqësojnë.

Është tjetër kur ti haptas merr anë dhe i del përpara të të shohin fytyrën.

Kurse këta të pafytyrë marrin peng institucionin kryesor të drejtësisë, Gjykatën Kushtetuese.

Tjetri ngrihet si mi, një degjeneratë njerëzor si ai, nuk ka tjetër, dhe ikën nga takimi.

Po ka turpe të tilla më të mëdha, sepse i nxirret dosja e Oltion Bistrit.

Ky është shteti që ndërtoi Edi Rrama.

Kjo është drejtësia që ndërtoi Edi Rama.

Unë i them këto fjalë me një keqardhje shumë të thellë, por nuk mund të mos i them para jush qytetarë, kur shoh se si nëpërkëmbeni ju nga ata të cilët për ju dhe në emër tuaj duan të bëjnë të drejtën, ligjin, Kushtetutën.

Ju garantoj se standard i tillë në botë nuk ekziston.

Unë nuk them se nuk ka qenë pa të meta Gjykata Kushtetuese, por kurrë nuk ka qenë e tillë.

Edhe atëherë kur ka dhënë 37 vendime kundër qeverisë time, nuk ka qenë e tillë.

Edhe atëherë kur në gjykatë ishin anëtarë të kryesisë së PS, nuk ka qenë e tillë.

Sot ajo është në gjendjen më të turpshme, më të mjeruar.

Me njerëzit më pa dinjitet që mund të bëhen.

Unë mund t’i marr një nga një dhe të analizoj shkaqet konkrete të qëndrimeve të djeshme.

Por nuk do e bëj sepse më shumë se çdo shkak flet qëndrimi i tyre, flet paturpësia e tyre e zvarritjes tre herë.

Njerëz më të turpshëm për një detyrë se ata nuk.

Por ky është një fenomen.

Të dashur qytetarë e qytetare, kjo është krijesa e narkoshtetit.

Ju e patë se si një javë më parë, qeveria e drejtësisë dhe kryeministri i drejtësisë shkelmoi mbi dokumente zyrtare edhe të institucionit të tij, edhe të vendit fqinj, mbi ligjin dhe Kushtetutën, në një akt pafytyrësie ekstreme.

Po pse kështu? Se i tillë është kryeministri i vendit.

Ndaj dhe ata sillen në këtë mënyrë ndaj jush qytetarë.

Ata janë me shkollë, këta mender-gjykatës një pjesë e tyre, turp-gjykatës një pjesë e tyre.

Këta janë me shkollë. Ose kanë fakultet juridik ose kanë fakultete të tjera.

Pra nuk janë njerëz të palexuar.

Por janë njerëz të zhveshur nga çdo moral njerëzor, nga çdo moral zyrtari.

Janë njerëz që shkelmojnë mbi ju si larva qytetarë, janë njerëz që shkelmojnë mbi interesat tuaja.

I them të gjitha këto me një qëllim, se ju jeni shpresa e fundit dhe e vetme e këtij vendi.

Shikoni se ku ka arritur.

Ju jeni shpresa e fundit dhe e vetme e këtij vendi, prandaj të vazhdojmë me vendosmërinë më absolute gjer në triumfin e moralit, e të drejtës, e legjitimitetit, e dinjitetit të qytetarëve, interesit të tyre dhe të Shqipërisë.