Skadon Marrëveshja SHBA-Rusi, shefi i OKB: Bota ngeli pa kontrollin e armëve bërthamore

Sekretari i Përgjithshëm i OKB-së, António Guterres, vlerësoi se skadimi i marrëveshjes New START është një moment serioz për paqen dhe sigurinë ndërkombëtare dhe u bëri thirrje Rusisë dhe Shteteve të Bashkuara të Amerikës që të fillojnë negociatat mbi një kuadër të ri të kontrollit të armëve bërthamore pa vonesë.

Marrëveshja New START, e cila skadoi në mesnatë të mërkurën, kufizoi numrin e kokave bërthamore strategjike që Rusia dhe Shtetet e Bashkuara mund të vendosin, si dhe numrin e raketave dhe bombarduesve të lëshuar nga toka dhe nëndetëset të projektuara për t’i transportuar ato.

Një botë pa kufizime në armët bërthamore

“Për herë të parë në më shumë se gjysmë shekulli, përballemi me një botë pa kufizime detyruese mbi arsenalet strategjike bërthamore të Federatës Ruse dhe Shteteve të Bashkuara, dy shteteve që zotërojnë shumicën dërrmuese të armëve bërthamore në botë”, tha Guterres në një deklaratë.

Ai paralajmëroi se zhbërja e arritjeve të dekadave të kontrollit të armëve po ndodhte në një kohë kur, tha ai, rreziku i përdorimit të armëve bërthamore ishte në nivelin më të lartë në dekada.

Thirrje për veprim

Në të njëjtën kohë, ai theksoi se ekziston një mundësi për të “rivendosur” dhe krijuar një regjim të kontrollit të armëve të përshtatur ndaj mjedisit global në ndryshim, dhe përshëndeti deklaratat e udhëheqësve të Rusisë dhe Shteteve të Bashkuara mbi nevojën për të parandaluar rikthimin e përhapjes së pakontrolluar të armëve bërthamore në botë.

“Bota tani pret nga Rusia dhe Shtetet e Bashkuara që fjalët të përkthehen në vepra”, tha Guterres, duke u bërë thirrje të dy vendeve të kthehen në tryezën e negociatave pa vonesë dhe të bien dakord për një marrëveshje pasuese që do të rivendoste kufijtë e verifikueshëm, do të zvogëlonte rreziqet dhe do të forconte sigurinë e përbashkët.