SHBA dhe Rusia duan të vazhdojnë dialogun ushtarak

SHBA dhe Rusia synojnë të rivendosin dialogun ushtarak, i cili është pezulluar që nga viti 2021. Përfaqësuesit e dy fuqive ranë dakord për këtë çështje në Abu Dhabi. Detajet nuk dihen ende.

Përfaqësuesit e Shteteve të Bashkuara dhe Rusisë kanë rënë dakord të rivendosin një dialog midis zyrtarëve të lartë ushtarakë, i cili ishte pezulluar që nga viti 2021. Kjo u njoftua nga Komanda Evropiane e SHBA-së, EUCOM, pas bisedimeve në Abu Dhabi.

Dialogu u pezullua në vjeshtën e vitit 2021, pas rritjes së tensioneve midis dy vendeve. SHBA-ja, siç u theksua, e konsideron vazhdimin e bisedimeve “një faktor të rëndësishëm për stabilitetin dhe paqen globale”.

“Ky kanal komunikimi do të sigurojë vazhdimësinë në kontaktet midis forcave të armatosura”, thuhet në deklaratë. Nga ana tjetër, pala ruse nuk ka bërë asnjë deklaratë ose vlerësim zyrtar në këtë drejtim.

Negociatat në Abu Dhabi

Sipas burimeve amerikane, Alexus Gregory Grynkewich, si Komandant Suprem i forcave të NATO-s në Evropë, ka autoritetin për të zhvilluar një dialog ushtarak me Shefin e Shtabit të Përgjithshëm të Federatës Ruse, Valery Gerasimov.

Raportet e medias tregojnë se negociatat midis dy vendeve për vazhdimin e programit nga marrëveshja për kufizimin e çarmatimit bërthamor “New START” u zhvilluan gjithashtu në Abu Dhabi.

Sipas Axios, duke cituar njerëz të informuar mirë mbi negociatat, marrëveshja është afër arritjes, por ende nuk është finalizuar. Presidenti i SHBA-së, Donald Trump, u shprej përmes rrjetit social Truth, se nevojitet një “marrëveshje e re, e përmirësuar dhe e modernizuar” që mund të zgjasë shumë.

Sipas informacionit nga Shtëpia e Bardhë, edhe Kina duhet të përfshihet në një marrëveshje të re të mundshme./DW/