Pasivizimi i adresave në Luginë, padi kundër Serbisë në Gjykatën e Strasburgut

Gjykata e Strasburgut për herë të parë ka regjistruar padinë kundër Serbisë, lidhur me pasivizimin e adresave të shqiptarëve që jetojnë në Luginë, Medvegjë dhe Bujanoc.

Pasi është pranuar padia nga Gjykata e Strasburgut, avokati Drini Grazhdani bënë të ditur se ajo është regjistruar për shkeljet e të drejtave të njeriut që kanë ndodhur ndaj Teuta Fazliu, hap ky procedural shumë i rëndësishëm, duke marrë parasysh se kjo Gjykatë refuzon mbi 90% të rasteve që në fazën fillestare.

“Qëllimi im kryesor është që përmes këtij rasti, Gjykata të zbatojë procedurën e vendimit pilot (rregulla 61). Kjo do të thotë që vendimi të mos mbetet vetëm për Teutën, por të detyrojë Serbinë të ndalojë këtë praktikë sistematike për të gjithë dhe të aplikohet në të gjitha rastet e ngjashme,” sqaroi avokat Drin Grazhdani ndërsa e konsideron si një fitore fillestare i bënë thirrje të gjithë të prekurve nga pasivizimi i adresave që të ndjekin procedurat e brendshme ligjore në Serbi, pa marrë parasysh faktin se Serbia i refuzon ato, dhe zotohet se do jetë i përkushtuar që të përfundojë me fitore të plotë këtë çështje.

Ndryshe, Serbia është angazhuar në spastrim etnik administrativ ndaj shqiptarëve, duke i pasivizuar adresat jo vetëm të atyre që punojnë jashtë, por edhe të atyre që jetojnë brenda vendit. Ky pasivizim nuk është simbolik, i detyron shqiptarët të largohen, pasi qytetarët humbasin të drejtën për të marrë letërnjoftim/pasaportë të re, të drejtën e pensionit, sigurimin shëndetësor, të drejtën e votës, etj.