Shkeljet në tenderin për Aeroportin e Vlorës, SPAK merr të pandehurit e parë

Pas një viti hetimesh për koncesionin e Aeroportit të Vlorës, SPAK ka dyshime të forta se kompania fituese ishte paracaktuar ndërsa ka thirrur anëtarët e Komisionit të Vlerësimit të Ofertave dhe ka marrë të pandehurit e parë, ku akuzat përfshijnë shkelje të barazisë në tendera dhe favorizim të një kompanie të caktuar.

“SPAK pas gati 1 vit hetimesh ka dyshme të forta se kontrata koncesionare për aeroportin e Vlorës është lidhur mbi bazën e shkeljes së procedurave të barazisë në tendera, po ashtu dhe gara për shpalljen fituese të konsorciumit të kompanive është paracaktuar,” raporton News24 duke saktësuar se hetimi gati 1 vjeçar është drejtuar nga kreu i SPAK, Klodian Braho, kreu i SPAK, i cili pak ditë më parë ka thirrur dhe ju ka komunikuar akuzën disa personave për veprën penale të shkeljes së barazisë në tendera.

Dhe, pavarësisht se ky hetim është mbajtur në sekret të plotë, burimet bëjnë me dije se vepra penale e shkeljes së barazisë në tendera u është komunikuar këtyre personave për shkak se mund të parashkruhej, por nga ana tjetër është duke u hetuar dhe për vepra më të rënda penale, sic është ajo e korrupsionit apo e pastrimit të parave.

“SPAK ka komunikuar akuzat e shkeljes së barazisë në tendera për dy anëtarë të komisionit të vlerësimit të ofertave pasi janë gjetur shkelje ndërkohë që po vijon hetimi lidhur për vepra të tjera penale.

Hetimet janë duke vijuar dhe në vijim do të ketë edhe detaje të reja sa i përket zyrtarëve të lartë të përfshirë në këtë çështje se prokurorët kanë dyshime të forta se kompanitë fituese janë të paracaktuara dhe ka dyshime se janë të përfshirë zyrtarë të lartë,“ raporton News24.

Ndryshe, Koncencioni i Aeroportit të Vlorës u vu në hetim paraprak në korrik të vitit të kaluar nga SPAK mbi bazën e kërkesës së bërë nga një qytetar, emri i të cilit nuk u bë publik. SPAK nuk dha shpjegime të mëtejshme se çfarë po hetonte dhe kush ishin personat që kishte vënë nën hetim, raporton News24, por tashmë thuajse një vit më vonë, prokurorët kanë marrë të pandehurit e parë në lidhje me këtë projekt i cili është në hetim dhe nga Prokuroria e Tiranës për shkak të përplasjes së dy aksionerëve kryesorë, Begjet Pacolli dhe Valon Ademi.