Berisha: Edi Rama ka mobilizuar patronazhistë me në krye Sokol Ballukun, për të varrosur aferën e Lubisë

Edi Rama ka mobilizuar patronazhistë dhe sahanlëpirësit me në krye Sokol Ballukun për të varrosur aferën e Lubisë, tha Kryetari i Partisë Demokratike, Sali Berisha, para deputetëve të Grupit Parlamentar të PD.

Mbledhjen e sotme të Grupit Parlamentar të Partisë Demokratike, Kryetari i PD e filloi me përshëndetjen e armëpushimit në mes SHBA dhe Iranit, duke uruar të sjellë paqe të qëndrueshme.

“Së pari, shpreh vlerësimin tim, tonin, të PD dhe opozitës për armëpushimin e arritur në luftën në Gjirin Persik midis SHBA, Izraelit dhe Iranit.
Le të urojmë që ky armëpushim të shndërrohet në një marrëveshje paqeje të qëndrueshme për vendet dhe popujt e këtij rajoni, rajoni siç faktohet i një rëndësie strategjike dhe nevralgjike për energjinë e botës,” tha Sali Berisha ndërsa lidhur me situatën në Shqipëri dhe gjendjen me çmimin e naftës theksoi se Shqipëria duhet të vendos regjim fiskal mbi karburantet njësoj si Kosova dhe Maqedonia.

“Pa diskutim që lufta e Gjirit Persik në Shqipëri dhe në mbarë botën ka ndikuar në çmimin e naftës.
Dhe pavarësisht nga marrëveshja e armëpushimit e arritur me ndërmjetësimin e Pakistanit, pasojat e krijuara nga bllokimi i Ngushticës së Hormuzit dhe goditja nga Irani i impianteve më të mëdha të gazit dhe naftës në rajon kërkojnë javë dhe muaj për t’u normalizuar.
Ndaj dhe grupi ynë parlamentar dhe opozita kërkon me çdo kusht përmbysjen e sistemit fiskal aktual mbi litrin e naftës.
Sistem absolutisht ndëshkues totalisht mbi qytetarin shqiptar. Sistem i cili ka në bazë një taksë prej 1.1 euro për litër nafte. Një marrëzi, një taksë që tejkalon çdo vend tjetër të planetit. Një taksë e cila penalizon më shumë ata që nuk kanë vetura se ata që kanë vetura.
Sigurisht që penalizon ata që kanë vetura dhe i penalizon në mënyrën më të pamerituar, por penalizon më shumë fermerët, penalizon më shumë pensionistët, të gjithë popullatën tjetër me rritjen e çmimeve të transportit, ushqimeve, etj.
Pra, si gjaku i një ekonomie, asgjë nuk ndikon më shumë direkt tek xhepat e qytetarëve se nafta.
Mungesa e ndjeshmërisë së qeverisë ndaj këtij faktori ngjitet në nivel kriminal.
Si mund të justifikohesh para qytetarëve kur ti vendos taksën më të lartë në botë? Më të lartë se Singapori, më të lartë se Hong Kongu, 61 përqind të çmimit të naftës e përcakton taksa.
Dhe në qoftë se e proporcionon me të ardhurat, një gjerman shpenzon për naftën 1.25 përqind të të ardhurave ditore.
Një shqiptar shpenzon për naftën 7.3 përqind të të ardhurave ditore. 7 herë më shumë.
Çmimet po rriten, tokat djerrë po shtohen.
Bagëtitë theren sepse çmimi i ushqimeve të bagëtive rritet.
Të gjitha këto sirena që bien, injorohen në mënyrën më të papërgjegjshme nga Edi Rama.
Kemi dy vende përreth, Kosovën dhe Maqedoninë. Ne duhet të vendosim atë regjim fiskal që të paktën qytetarët shqiptarë të mos shkojnë nga Elbasani për të mbushur serbatorin e benzinës në Strugë. Apo nga Shkodra në Mal të Zi.
Asnjë qëndrim i përgjegjshëm, vetëm mashtrim.
Vetëm nga rritja e çmimit në 220 lekë, shteti fiton 8 lekë për litër më shumë. Dhe kjo na del edhe rritje ekonomike. Pra kjo del edhe GDP më e lartë. Nuk ka mashtrim më të madh se kjo. Sepse u pa, është e qartë, faktor kryesor i rritjes së GDP janë të ardhurat fiskale si kurrë më parë,” tha lideri i opozitës duke rrëzuar propagandën e Edi Ramës me faktin se me të njëjtin çmim në bursë, nafta në kohën kur në pushtet ishte PD shitej 140 lekë, tani është mbi 220 lekë.

“Tani, propaganda e tij, propaganda e mashtrimit, kërkesave tona për përgjysmimin e taksave u përgjigjet me mashtrimin se çmimet kanë qenë po kaq të larta gjatë periudhës tonë.
Mashtrim i turpshëm.
Unë kam këtu këto të dhëna. Me 7 prill të vitit 2013, nafta në bursën ndërkombëtare ishte 97 dollarë, në tregun shqiptar është shitur me 140 lekë.
Me 7 prill të vitit 2022, nafta në bursë ka qenë 97.2 dollarë, pra e njëjtë, në Shqipëri është shitur me 228 lekë.
Nafta në bursë çmimin më të lartë nga viti 2005 gjer sot e ka pasur në vitin 2008, as në periudhën e COVID-it, as në periudhën e Pranverës Arabe. Ishte viti kur nafta arriti 147 dollarë për shkak të rritjes së kërkesës në bursë.
Dhe në verën, në kulmin e kësaj, nafta në Shqipëri shitej 150-160 lekë.
Për të qartësuar se tani nxjerr edhe njerëz në telefona, se tani përveç banalistëve ai angazhon edhe patronazhistët në propagandën e tij vulgare. Pra, asnjë rrugë tjetër nuk ka për të shpëtuar nga kjo situatë dramatike përveç përgjysmimit të taksave. Vendosjes së një sistemi fiskal të njëjtë me Maqedoninë dhe Kosovën.
Ai nuk ka asnjë lloj cipe. Ata thotë, e kanë taksën në makinë. Të njëjtën taksë kemi me Kosovën dhe Maqedoninë. Të njëjtën. Ndaj dhe duhet që ne të insistojmë në mbrojtje të interesit publik, por njëkohësisht ky është një kazus për revoltë të fuqishme kundër kësaj qeverie.
Është taksa e saj e lartë. Vetëm një injorant mund të pranojë një taksë të tillë. Mund të vërë si satër çmimin e energjisë, çmimin e naftës,” tha Berisha duke akuzuar Edi Ramën se ka mobilizuar sahanlëpirësit me në krye Sokol Ballukun për të varrosur aferën e Lubisë.

“Edi Rama, në fushatën e tij të mashtrimit, ka mobilizuar dhe po mobilizon, thashë përveç patronazhistëve, por edhe sahanlëpirësit e tij me në krye Sokol Ballukun që është edhe anëtar kryesor i grupit të strukturuar kriminal, por jo i vetëm, aktiv në trillime dhe mashtrime janë edhe të tjerë, të cilët nga mëngjesi gjer në darke sulmojnë qëndrimet e opozitës, sulmojnë opozitën vetëm e vetëm për të mbrojtur Edi Ramën.
Dëshmojnë një amoralitet të plotë, flasin për sistem demokratik. Imagjinoni ju se gjer ku arrijnë.
Përpiqen që me sulmet e opozitës të sfumojnë aktet të paprecedentë në histori të vjedhjes dhe përdorimit të mandateve të krimit për mbrojtjen nga vjedhja të Edi Ramës dhe Lubi Ballukut.
Përpiqen të varrosin aferën Balluku.
Tani po punojnë për të vendosur paqe edhe me Lali Vjedhësin. I çuan drejtor një nga eksponentët e 5D-ve. Pasi e rrihnin në burg, tani i çuan vartësin e tij drejtor në burg. Patronazhistin Kupi.”

Për nesër, krydemokrati paralajmëroi se Kryetari i Gjykatës së Lartë, Sokol Sadushi, do ta liroi Erion Veliajn, vendim, i cili sipas tij, kërcënon sigurinë e vendit dhe rajonit

“Nesër Sadushi, që kërcënon absolutisht sigurinë e Shqipërisë dhe vendeve të rajonit, del me vendimin që ata që janë në paraburgim pa vendim të prerë, të dalin.
Ky është vendimi Veliaj.
Por nga vendimi Veliaj përfitojnë me dhjetëra bosë të drogës, krerë të organizatave kriminale.
Por kjo është gjetur rruga e paqes midis klaneve mafioze. Por keni parë që studiot e kontrolluara nga Rama nuk thonë një fjalë të vetme. Nuk shqipërojnë një fjalë të vetme, nuk bëjnë një transparencë të vetme për të gjitha këto.”

Në fund, Kryetari i Partisë Demokratike tha para Grupit Parlamentar të PD se shqiptarët në 17 prill do të mbrojnë projektin e jetës së tyre, ëndrrën europiane

“Dua të ju informoj se, procesi i vlerësimit të IBAR mbeti në klasë edhe dje. Pra Këshilli i Ambasadorëve që shqyrton këtë raport, që ka të bëjë me zbatimin e themeleve, gjërave themelore, shtetit ligjor dhe luftës ndaj korrupsionit, çdo javë mbetet në klasë.
Çdo javë shtohen vendet që e kundërshtojnë.
Pra, Shqipëria për shkak të vjedhjeve të Ramës, Lubisë dhe Lindave të AKSHI-t, veçohet dhe ai nxjerr zëdhënësat e tij të thotë, që Shqipëria është para Malit të Zi, ndërkohë që Mali i Zi u votua pozitivisht, unanimisht që në fillim të Marsit.
A do pranojnë shqiptarët që fatin e tyre ta përcaktojnë vjedhjet e Edi Ramës dhe Lubi Ballukut? Unë nuk besoj kurrë,” tha Kryetari i Partisë Demokratike, Sali Berisha, duke përfunduar:
“Ndaj dhe data 17 është dita e të gjithë shqiptarëve, pavarësisht bindjeve politike, për të cilët ëndrra Europiane është projekti i jetës së tyre, familjes së tyre, fëmijëve të tyre dhe vendit të tyre.”