Sot hyn në funksion të plotë Sistemi Evropian i Hyrje-Daljes, EES, në kufi

Duke filluar prej sot, në 29 vendet e hapësirës Schengen hyn në funksion të plotë Sistemi Evropian i Hyrjes/Daljes (Entry/Exit System – EES), i cili zëvendëson vulosjen manuale të pasaportave me regjistrimin elektronik të hyrjeve dhe daljeve të shtetasve nga vendet jo-anëtare të Bashkimit Evropian.

Lajmin e bëri dje të ditur, Ministria për Evropën dhe Punët e Jashtme e Shqipërisë duke theksuar se ky sistem, i cili ka nisur të zbatohet pjesërisht që prej tetorit 2025, do të aplikohet për të gjithë shtetasit që udhëtojnë për qëndrime afatshkurtra, deri në 90 ditë brenda një periudhe 180-ditore, në zonën Shengen.

Qytetarët duhet të kenë parasysh se në hyrjen e parë pas datës 10 prill 2026, në pikën kufitare do të regjistrohen:

– të dhënat e pasaportës;

– fotografia e fytyrës;

– gjurmët e gishtërinjve.

Refuzimi për të dhënë të dhënat biometrike sjell refuzimin e hyrjes në territorin Schengen.

Në fazën fillestare të zbatimit mund të ketë vonesa në aeroporte, porte dhe pika kufitare tokësore; për këtë arsye, qytetarët këshillohen të paraqiten më herët për udhëtim.

Pasaporta duhet të jetë e vlefshme dhe në gjendje të mirë fizike.

Nuk kërkohet aplikim paraprak për EES; regjistrimi kryhet në momentin e kalimit kufitar.

Sistemi nuk ndryshon rregullin ekzistues të qëndrimit: maksimumi 90 ditë në çdo periudhë 180-ditore.

Ministria për Evropën dhe Punët e Jashtme rekomandon që qytetarët të informohen paraprakisht mbi procedurat e reja dhe të planifikojnë udhëtimet e tyre duke marrë në konsideratë kohën shtesë të nevojshme për kontrollet kufitare.

Për informacione të mëtejshme, qytetarët mund të konsultojnë faqen zyrtare të Bashkimit Evropian për EES: https://travel-europe.europa.eu/ees

Ndryshe, Sistemi Evropian i Hyrjes/Daljes, EES, zbatohet për shtetasit jo-BE dhe jo-Schengen që udhëtojnë drejt vendeve të zonës Schengen ose BE-së për qëndrime të shkurtra deri në 90 ditë brenda një periudhe 180-ditore.

Këtu përfshihen edhe shtetasit britanikë, si dhe udhëtarët që nuk kanë nevojë për vizë, pavarësisht nëse udhëtojnë për turizëm apo për biznes. Sistemi zbatohet edhe për personat që kanë pronë në BE, por nuk kanë leje qëndrimi.

Irlanda dhe Qiproja përjashtohen nga përdorimi i EES, që do të thotë se ato do të vazhdojnë me kontrollin manual të pasaportave. Gjithashtu, shtetasit e Andorrës, San Marinos, Vatikanit dhe Monakos nuk do t’i nënshtrohen Sistemit EES.