Krimet në fushën e drogës arritën rekord, ia kalojnë dhe kulmit të kanabisit në 2016

Krimet në fushën e drogës arritën nivel rekord në vitin 2025, sipas të dhënave të publikuara nga Instat. Vitin e kaluar u shënuan mbi 3.649 krime në fushën e drogës, me rritje prej 27 për qind në krahasim me vitin e mëparshëm.

Ky është niveli më i lartë që është regjistruar ndonjëherë, të paktën që nga viti 2015, kur INSTAT publikon të dhënat. Madje krimet në fushën e drogës në 2025-n ishin më të larta edhe se në 2016-n, kur shënohej rekordi i deritanishëm prej 3.248 procedimesh dhe përkoi me periudhën kur në vend lulëzoi kultivimi i kanabisit.

Tregtimi i drogave, kultivimi etj. u rendit si krimi i dytë më i përhapur në vend, vetëm pas shkeljeve të qarkullimit rrugor, që zunë vendin e parë me 6.103, me një rritje të lehtë prej 6.8 për qind.
Krimet me dashje kundër shëndetit ishin në vend të tretë, më rritje prej 27 për qind, të ndjekura nga vjedhjet, që ishin 22 për qind më të larta.

Rritje të fortë kishin dhe përndjekjet me gati 70 për qind, ose 392 raste. Korrupsioni shënoi rënie me 8.6 për qind, në 255 raste.

Sipas Instat, në vitin 2025, janë evidentuar gjithsej 38.345 vepra penale, 17.4 për qind më shumë, krahasuar me vitin 2024.

Numri i autorëve të dyshuar për vepra penale në vitin 2025 arriti në 45.334, me një rritje prej 13.2 për qind, krahasuar me vitin paraardhës:

– 93,3% janë meshkuj, ndërsa grupmosha më e përfaqësuar është ajo 30-44 vjeç 36.2 për qind;

– Numri i autorëve pa përsëritje është 39.027, 16.7 për qind më shumë, krahasuar me vitin 2024.

Në vitin 2025, janë regjistruar 19.145 persona të dëmtuar, 7.8 për qind më shumë, krahasuar me një vit më parë:

– 39.3 për qind e tyre janë të dëmtuar për krime kundër personit;

– Femrat e dëmtuara përbëjnë 36,7% të kategorisë krime kundër personit, kryesisht në krime seksuale, krime kundër moralit dhe dinjitetit si edhe në krime kundër fëmijëve, martesës dhe familjes.

Numri i procedimeve penale të regjistruara në vitin 2025, është 27.049, me një rritje prej 8.5 për qind, krahasuar me vitin e kaluar:

– Nga 24.491 procedime penale të përfunduara, 27.6 për qind e tyre janë pushuar, 27.8 për qind janë pezulluar dhe 42.5 për qind janë dërguar për gjykim në gjykatë.

Në vitin 2025, janë regjistruar 14.356 persona të pandehur, 9.0 për qind më shumë, krahasuar me një vit më parë:

– Meshkujt përbëjnë 94.0 për qind të numrit gjithsej të të pandehurve.

Numri i të burgosurve në institucionet e ekzekutimit të vendimeve penale është 4.503, 0.3 për qind më shumë, krahasuar me vitin 2024:

– Meshkujt përbëjnë 98,4 % të numrit gjithsej të të burgosurve./Monitor/