Gjashtë nga tetë kompani të sigurimeve i rritën fitimet për vitin 2025, kryeson Sigal me rritje 267% 

Kompanitë e sigurimeve në tregun e Jo-Jetës e mbyllën të gjitha me fitim vitin 2025, ndërsa shumica e tyre e përmirësuan rezultatin financiar krahasuar me një vit më parë.

Sipas informacionit nga pasqyrat e audituara financiare të kompanive, Sigal Insurance Group raportoi një fitim neto prej gati dy miliardë lekësh, me diferencë të ndjeshme nga kompanitë e tjera.

Fitimi i Sigal (i konsoliduar me filialet e tjera të grupit brenda dhe jashtë vendit, përfshi ato në Kosovë dhe Maqedoninë e Veriut) u rrit me 267% krahasuar me një vit më parë.

Rritja e fortë e fitimit të Sigal u përcaktua pjesërisht nga rritja e të ardhurave neto nga veprimtaria e sigurimit, me 6 për qind krahasuar me 2024), por sidomos nga rritja e zërit të të ardhurave të tjera.

Në veçanti, Sigal raportoi një rritje të fortë në zërin e të ardhurave nga rimbursimi i dëmeve, që arritën në 814 milionë lekë, 331% më shumë krahasuar me një vit më parë. Ndërkohë, edhe shpenzimet neto për dëme u ulën me 7% krahasuar me një vit më parë.

Edhe në nivel të pasqyrave financiare individuale (përjashtuar rezultatin e filialeve), Sigal raportoi një rritje të fortë të fitimit në 1.24 miliardë lekë, tre herë më shumë krahasuar me një vit më parë.

Eurosig për vitin 2025 raportoi një fitim neto në vlerën e 726 milionë lekëve, në rritje me pothuajse 7% krahasuar me një vit më parë. Eurosig raportoi rritje të primit të fituar neto me gati 10 për qind, por kjo rritje u balancua nga rënia e të ardhurave financiare nga investimet dhe nga rritja e shpenzimeve, duke përfshirë ato për dëme.

Përcaktuese në rezultatin financiar me fitim dhe me një rritje të lehtë ishte një e ardhur shtesë në zërin të “fitime të tjera”, e paspecifikuar më tej në pasqyrat financiare të kompanisë.

Albsig për vitin 2025 raportoi një fitim neto në vlerën e 376 milionë lekëve, në rritje me 22.5 për qind krahasuar me një vit më parë. Përcaktues në rritjen e fitimit të Albsig ishte rritja e të ardhurave neto, kryesisht të të ardhurave neto nga primet e sigurimit, si edhe rritja në zërin e të ardhurave nga shitja e aktiveve afatgjata materiale neto.

Kompania Sigma Vienna Insurance Group e mbylli vitin 2025 me një fitim neto në vlerën e 251 milionë lekëve, në rënie me 22% krahasuar me një vit më parë.

Rënia e fitimit erdhi kryesisht për shkak të rritjes më të lartë të shpenzimeve për dëme dhe shpenzimeve të tjera të aktivitetit në raport me rritjen e të ardhurave neto nga veprimtaria e sigurimit dhe të ardhurave të tjera.

Insig gjithashtu rriti ndjeshëm fitimin për vitin 2025, me një fitim në vlerën e 243 milionë lekëve, në rritje me 440 për qind krahasuar me një vit më parë. Rritja e fitimit të Insig u përcaktua kryesisht nga rritja e primit të fituar neto.

Intersig e mbylli vitin me fitim në vlerën e 184 milionë lekëve, në rritje me 14.2 për qind krahasuar me një vit më parë. Faktori me peshën kryesore në rritjen e fitimi ishte përmirësimi i primit të fituar neto.

Edhe Atlantik e mbylli vitin 2025 me fitim neto në vlerën e 148 milionë lekëve, por me një rënie të lehtë prej 2 për qind krahasuar me vitin 2024. Rënia e fitimit ka ardhur kryesisht si rezultat i zgjerimit të vlerës së dëmeve neto të paguara.

Edhe kompania Ansig vitin e kaluar ka arritur një fitim në vlerën e 0.4 milionë lekëve, në përmirësim nga rezultati me humbje afërsisht 24 milionë lekësh i një viti më parë.

Sipas shifrave zyrtare nga Autoriteti i Mbikëqyrjes Financiare, AMF, fitimi total në nivel tregu sigurimesh për 2025 arriti në 3.54 miliardë lekë ose 36.6 milionë euro. Fitimi i tregut u rrit me 55.8 për qind krahasuar me një vit më parë./Monitor/