Albin Kurti kërkon marrëveshje politike për të shmangur zgjedhjet e reja

Kryetari i LVV dhe Kryeministri në detyrë i Kosovës, Albin Kurti, ka bërë të ditur se komunikimi me liderët e partive politike po vazhdon në përpjekje për të gjetur një zgjidhje për ngërçin institucional.

Synimi i tij dhe i bashkëbisedimeve politike, tha Kurti, është arritja e një marrëveshjeje që do të mundësonte tejkalimin e situatës aktuale pa shkuar sërish në zgjedhje.

Zgjedhjet e reja nuk do ta zgjidhnin domosdoshmërisht problemin, tha ai, ndërsa përsëritja e tyre do të ishte e panevojshme.

“Jemi në komunikim dhe do të përpiqemi çdo ditë që të arrijmë marrëveshjen politike, në mënyrë që t’i shmangim zgjedhjet e panevojshme,” tha Albin Kurti duke i bërë thirrje liderëve të partive të tjera që të angazhohen në dialog dhe të kërkojnë një dakordim politik.

Në fund, Kryetari i LVV, Albin Kurti, tha se qytetarët presin zgjidhje të situatës dhe jo një proces tjetër zgjedhor, duke e cilësuar marrëveshjen politike si rrugën për tejkalimin e krizës institucionale.