Dialogu Kosovë -Serbi, Ambasadori Scott: Palët të tregohen të guximshëm!

Presidenti i Serbisë, Aleksandar Vuçiç, ka pritur ambasadorin amerikan në Beograd, Kyle Scott, me të cilin ka biseduar për dialogun mes Beogradit e Prishtinës, si dhe për arritjen e zgjidhjes së çështjes së Kosovës.

Vuçiç edhe një here theksoi nevojën e arritjes së një kompromisi të vërtetë, që do të garantonte një stabilitet të përhershëm dhe të mundësonte një zhvillim të qëndrueshëm ekonomik, njoftojnë mediet serbe.

Të dy bashkëbiseduesit u pajtuan se dialogu është i vetmi mjet në përmirësimin e rrethanave në Kosovë, aq sa të jemi të përgjegjshëm për t’iu shmangur konfliktit.

Nga ana e tij, ambasadori Scott, ftoi palët në dialog që të tregohen të guximshëm, fleksibël dhe kreativ në arritjen e zgjidhjes së çështjes që të kontribuonte në stabilitetin e rajonit.

Më tej, bashkëbiseduesit folën për mbështetjen e SHBA-së në integrimin e Serbisë në BE.