Amerika fut në sherr FIFA-n dhe La Liga-n

Presidenti i FIFA-s, Gianni Infantino, ka shprehur shqetësim në lidhje me propozimin e La Liga-s për zhvillimin e ndeshjes Girona-Barcelona në Shtetet e Bashkuara.

Kjo zgjedhje ka krijuar shumë debate dhe krijon një avantazh për katalanasit, duke parë se kundërshtarët e tyre do të humbasin faktorin fushë, me ndeshjen që pritet të zhvillohet në Miami.

“Do të preferoja të shihja një ndeshje të madhe të MLS në Amerikë dhe jo një të La Liga-s. Koncepti i përgjithshëm i futbollit është që ta luash në fushën tënde një ndeshje që luhet në ‘shtëpi’ dhe jo në një shtet të huaj”, ka thënë Infantino.

Nuk ka vonuar përgjigjja e presidentit të La Liga-s, Javier Tebas, i cili ka shkruar në Twitter:

“Dua t’i kujtoj presidentit të FIFA-s se në MLS marrin pjesë tri skuadra nga Kanadaja, një vend që ka një kampionat të vetin”.

Toronto, Montreal dhe Vancouver luajnë në MLS, por i zhvillojnë në fushën e tyre ndeshjet që luajnë në shtëpi. Infantino, ndërkohë, ka konfirmuar se ky plan do të duhet të miratohet nga Federata Spanjolle dhe ajo Amerikane e Futbollit, ashtu si nga UEFA dhe CONCACAF, organizatat që drejtojnë futbollin europian dhe atë të Amerikës së Veriut, duke shtuar:

“Edhe FIFA duhet të përfshihet në vendimmarrje, duke parë se kjo ndeshje do të ketë ndikim në nivel global”.

Në lidhje me këtë çështje janë shprehur edhe trajnerët e Barcelona-s dhe Real Madrid. Valverde tha:

“Është akoma shumë larg. Është diskutuar me lojtarët dhe qëllimi është që kjo ndeshje të shtyhet”. Një ide kjo që nuk pëlqehet nga Lopetegui, i cili ka thënë: “Nuk jam dakord. Mendoj se të gjithë duhet të luajmë në të njëjtat kushte, në të njëjtat fusha. Kjo është ajo që siguron barazinë në kampionat”.

Në fund, drejtuesi e La Liga-s kanë bërë të ditur se bëhet fjalë për një projekt afatgjatë, “që synon të promovojë futbollin në Amerikë dhe Kanada”