Prokurorja e Përgjithshme e Edi Ramës nesër i raporton Gramoz Ruçit. Lexoni të plotë këtë vepër humoristike…  

Bazuar në urdhrin nr. 31, datë 18.9.2018 të Kryetarit të Parlamentit, Gramoz Ruçi, nesër Prokurorja e Përgjithshme e Edi Ramës, Arta Marku, ndonëse pa çadër, do të raportoj mbi gjendjen e kriminalitetit në Shqipëri.

Në “Raportin vjetor të Prokurorit të Përgjithshëm mbi gjendjen e kriminalitetit për vitin 2017” vërehet se edhe pa Adriatik Llallën, lufta kundër korrupsionit është një ndër prioritetet kryesore të organit të prokurorisë por rezultatet nuk është se kanë lulëzuar; Lufta ndaj krimit e veçanërisht atij të organizuar, është po aq qesharak sa në kohën e paraardhësit të Arta Markut dhe veçohet një çmenduri ‘sui generis’: “Prokuroria për Krime të Rënda ka filluar hetimet kryesisht për disa raste të trafikimit të narkotikëve të cilat janë evidentuar nga autoritetet e huaja, kryesisht nga Italia.” Pra, hetimet ishin në vartësi nga evidentimet e autoriteteve të huaja, kryesisht nga Italia!

Ndërkohë sa i përket “Efektivitetit të ndjekjes penale, cilësisë së përfaqësimit të akuzës në gjyq dhe elementët tjerë thelbësorë të veprimtarisë së institucionit” kur ato nuk i honeps dot as KPP e OMN, vështirë se do ta bëjën këtë gjë nesër ushtarët e Gramozit me komandant Taulantin në krye.

Sidoqoftë, edhe pse nuk është ese humoristike, ia vlenë të lexohen vetëm rritjet e efektivitetit të punës së Prokurores së Përgjithshme të Edi Ramës.

 Lufta kundër korrupsionit

Prokurorja e Përgjithshme e Edi Ramës raporton se gjatë vitit 2017 janë filluar kryesisht 12 procedime penale, ku veçon 3 procedime penale për “Korrupsion pasiv të funksionarëve të lartë shtetërorë ose i të zgjedhurve vendorë” dhe 6 procedime penale për “Korrupsion pasiv të gjyqtarëve, prokurorëve dhe funksionarëve të tjerë të organeve të drejtësisë”.

Nga prokuroria për Krime të Rënda janë kryer hetime proaktive në kuadër të 11 procedimeve penale për vepra të korrupsionit në sistemin e drejtësisë dhe korrupsionit të funksionarëve të lartë shtetërorë.

Mos qeshni, por 12 procedime penale shprehen edhe në përqindje, e sipas të dhënave statistikore rezulton se në vitin 2017 ka patur një rritje prej 69.6 % të numrit të procedimeve të regjistruara për veprat penale të korrupsionit, në krahasim me vitin 2016 dhe rritje prej 80.8 % të procedimeve të dërguara në gjykatë në krahasim me vitin 2016.

E kuptoni, në shtetin më të korruptuar në botë, procedohen 12 raste korrupsioni, dhe vetëm nga emisionet investigative në TV, kemi të paktën 120 raste korrupsioni, ku protagonistët e tyre më shumë janë ngritur në detyrë se sa kanë pësuar ndonjë masë!

Nuk dihet se kujt i thotë Arta Marku “Korrupsion aktiv” por për vitin 2017, për veprën penale “Korrupsion aktiv i personave që ushtrojnë funksione publike”, ajo raporton se organi i prokurorisë ka regjistruar 124 procedime penale, që përbën rritje me 2.6 herë ose 163.8 % në krahasim me vitin 2016. Janë dërguar në gjykatë 106 procedime penale, ndërsa në vitin 2016 rezultojnë 37 procedime të dërguara në gjykatë.

Nga të dhënat statistikore në vitin 2017, Arta Marku raporton një tendencë në rritje të procedimeve të regjistruara për veprën penale “Ushtrimi i ndikimit të paligjshëm ndaj personave që ushtrojnë funksione publike”, prej 41 % në krahasim me vitin 2016 dhe tendencë në rritje e procedimeve të regjistruara për veprën penale “Korrupsioni pasiv i personave që ushtrojnë funksione publike” prej 13 %. Gjatë vitit 2017 ajo raporton 3 procedime për veprën penale “Korrupsioni aktiv i funksionarëve të lartë shtetërorë ose të zgjedhurve vendorë”, ndaj 2 procedimeve të regjistruara në vitin 2016. Sa i përket “Korrupsionit pasiv të funksionarëve të lartë shtetërorë ose të zgjedhurve vendorë”, rezulton se janë regjistruar 13 procedime penale përkundrejt 11 procedimeve të regjistruara në vitin 2016 për këtë vepër dhe janë dërguar 2 procedime penale në gjykatë.

Siç duket Prokurorja e Përgjithshme e Edi Ramës nuk e ka për zemër ERTV-n sepse në çdo dalje publike të kryeministrit “gju më gju me popullin”, më shumë ka denoncime dhe gjyqe publike nga i pari i qeverisë se sa nga i gjithë ky mekanizëm i prokurorisë, ku siç shihet, as Ulsi Manja nuk qëlloi në shënjestër me përzgjedhjen që bëri.

Krimi i organizuar dhe krimet e rënda

Ky kapitull i Raportit të Prokurores së Përjgithshme të Edi Ramës mund të shërbej për një emision humoristik, por për institucionin  akuzës, e aq më pak Parlamentin e Shqipërisë, ky nuk mund të zëjë vend.

Në vendin i cili drejtohet nga krimi i organizuar, Prokuroria e Përgjithshme thekson se “lufta ndaj krimit e veçanërisht atij të organizuar, kërkon një përgjigje të koordinuar ndërinstitucionale e ndërkombëtare.”

Dhe, çfarë ndodhë, si realizohet kjo luftë?!

“Në këtë kuadër, Prokuroria për Krime të Rënda ka filluar hetimet kryesisht për disa raste të trafikimit të narkotikëve të cilat janë evidentuar nga autoritetet e huaja, kryesisht nga Italia.”

Pra, me një fjalë, po nuk u evidentuan nga autoritetet e huaja, Italia (Prokuroria Bari, Ankona, Lece), Gjermania, (me prokuroritë Mynih, Hamburg), Greqia e Maqedonia, siç thekson raporti, ky raport do të kishte shumë më pak faqe dhe ushtarët e Gramozit do të bezdisheni më pak nga Prokurorja e Përgjithshme e Edi Ramës duke lexuar Raportin.

Çuditërisht, ndërsa theksohen letërporositë dhe çudirat tjera me shtetet partnere, mungon pa dashje rasti i financierit të Habilajve, Nazer Seitaj i cili u ekstradua në Itali duke shkelur ligjin “pa dashje”!

Efektiviteti i ndjekjes penale…

 Efektiviteti i ndjekjes penale, cilësia e përfaqësimit të akuzës në gjyq dhe elemente të tjerë thelbësorë të veprimtarisë së institucionit, ndonëse është raportuar me superlativa bie ndesh jo vetëm me situatën kriminale në Shqipëri por edhe me gjithë ato hetime që KPP i ka bërë në pak raste që deri më tani ka trajtuar.

Dhe, kur krimin e kemi kudo, Raporti thekson se në vitin 2017 nga 30.036 çështje, 11.492 çështje janë dërguar në gjykatë, dhe nga gjykata është vendosur pushimi për 942 çështje, pra ky tregues përbën një shifër prej 8.2 % të çështjeve të dërguara në gjykatë në vitin 2017.

Ndonëse Reforma në Drejtësi dhe Edi Rama mburren se kanë tronditur bandën e gjyqtarëve, kjo shifër dëshmon se sulmi i kryeministrit ndaj gjyqtarëve qenka i gabuar, sepse “lepuri fle në prokurori” dhe nuk është gjykata ajo që nuk dënon:

“Gjatë vitit 2017 janë përfunduar 30036 çështje, 38,3 % janë dërguar për gjykim, 21,8 % janë pushuar, 37,2 % janë pezulluar dhe 2,7 % janë transferuar në prokurorinë kompetente.” Shif e shkruaj KPP, ONM dhe çuditë tjera që ju shpiki Fatmir Xhafaj me Agronin, Geronin etj.

Për të gjithë ata që janë pa humor, Raportin e plotë të Prokurorit të Përgjithshëm mbi gjendjen e kriminalitetit për vitin 2017, mund ta lexoni këtu: http://www.parlament.al/Files/Kerkese/raporti_PP.pdf