Thaçi i përgjigjet Haradinajt: Lufta nuk bëhet në studio televizive!

“Lufta nuk bëhet në studio televizive, por nëpër istikam”.

Kjo ishte kundërpërgjigja dhe leksioni i Presidentit Hashim Thaçi për kryeministrin Haradinaj i cili vazhdon ta përsëris se ndryshimi i kufijve nënkupton luftë, por Presidenti i Kosovës nuk sqaroi se pse vazhdon të komunikoj me kryeministrin përmes kamerave.

Ndërkohë Presidenti i Kosovës ka ripërsëritur se nuk do ta lejojë Asociacionin me kompetenca ekzekutive, as Republikën Srpska dhe se Ujmani dhe Trepça do të mbeten të Kosovës, siç janë.

Parlamenti, tha ai, po vonohet me nxjerrjen e një Rezolute që do të jepte një mbështetje të plotë të iniciativës për bashkëngjitjen e Luginës.

Këto deklarata Presidenti i Kosovës i bëri pas një takimi me kryetarin e PDSH-së, Menduh Thaçi, kur dhe u shprehë se mbështetë Maqedoninë në referendum dhe se kjo nuk është ndërhyrje.

Ndërsa kryetari i PDSH-së, Menduh Thaçi, tha se mbështetja e Kosovës është shumë e rëndësishme për ta.

Me këtë rast Presidenti i Kosovës, Hashim Thaçi, konfirmoi mundësinë e takimit me presidentin e Shteteve të Bashkuara, Donald Trump.

Presidenti pritet të udhëtojë në SHBA, ku do të marrë pjesë në Asamblenë e Përgjithshme të Kombeve të Bashkuara.