Vuçiç: Nuk shkova në OKB sepse do ma kërkonin njohjen e pavarësisë së Kosovës

Presidenti i Serbisë, Aleksandër Vuçiç, ka sqaruar sot vendimin e tij për të mos udhëtuar drejt New Jorkut për të marrë pjesë në Asamblenë e Përgjitshme të Kombeve të Bashkuara.

Vuçiç tha se nuk kishte gjetur një arsye për të shkuar atje, pasi sipas tij do të duhej të fliste me përfaqësuesit ndërkombëtarë dhe ata shqiptarë, dhe thotë se nuk e di se për çfarë do të mund të flisnin pasi sipas tij të gjitha gjërat janë thënë.

“Unë dua progres rrënjësorë rreth zgjidhjes së çështjes së Republikës së Kosovës, gjë të cilën ata nuk e duan”, tha presidenti i Serbise në Nish, me rastin e përurimit të fabrikës filipinase të auto-komponentëve elektronik IMI.

Me këtë rast ai ka folur për përfaqësimin që Bërnabiq dhe Daçiç  i kanë bërë Serbisë në Kombet e Bashkuara.

“Unë nuk mund të shkoja me ta dhe të përsëris të njëjtat gjëra. Më tregoni nëse jeni për përparim thelbësor, nëse është kështu atëherë këtu më keni dhe do të vija kudo që të më ftonit, në Bruksel, Grenlandë dhe kudo që të më ftoni. Por nuk vij për të humbur kohën time duke dëgjuar tregime boshe që i kam dëgjuar për vite të tëra, që Serbia duhet ta njohë pavarësinë e Kosovës”, tha Aleksandër Vuçiç .