75-vjetori i lindjes së Jusuf Gërvallës, Haradinaj kujton veprën e tij

Kryeministri Ramush Haradinaj duke kujtuar atdhetarin Jusuf Gërvalla, në 75-vjetorin e tij të lindjes tha se Jusuf Gërvalla, së bashku me të vëllanë Bardh Gërvallën dhe Kadri Zekën, mbetën në kujtesën shtetërore- si lajmëtarët e lirisë dhe si fuqi motorike e lëvizjes politike të shqiptarëve.

“Në mesin e shumë mendimtarëve dhe luftëtarëve për lirinë e Kosovës, emri i Jusuf Gërvallës veçohet, sepse ai rrëfen për një artist shumëdimensional që iu bë zëdhënës kohës dhe brezit të tij. Kujtojmë sot, në 75-vjetorin e lindjes, disidentin që shënoi me shembullin e tij prej kryengritësi vitet e tetëdhjeta, epokën kur populli ynë u rizgjua për të kërkuar të drejtën e tij për të jetuar i lirë e i barabartë. Jusufi, së bashku me të vëllanë Bardhin dhe Kadri Zekën u vranë me atentat, më 1982 në Gjermani, por mbetën në kujtesën shtetërore, si lajmëtarët e lirisë dhe fuqi motorike të lëvizjes politike të shqiptarëve, deri në frymën e fundit”, shkroi Haradinaj.

Për nder të veprës së Gërvallës,  Brigada 131 e UÇK-së mbajti emrin e tij.

“Lavdi Heroit të Kosovës, Jusuf Gërvalla”, përfundoi i pari i ekzekutivit.

Jusuf Gërvalla u lind në Dubovik, në komunën e Deçanit. Shkollimin e lartë e vijoi në Prishtinë e Ljubjanë, më pas punoi si gazetar në Shkup e Prishtinë. Një nacionalist i zëshëm, hyri në radarin e policisë sekrete jugosllave, duke u shtyrë të kërkonte azil në Gjermani ku themeloi Lëvizjen Popullore për Republikën e Kosovës që më pas u nda në dy fraksione Lëvizja Popullore e Kosovës dhe Lëvizja Kombëtare për Çlirimin e Kosovës, të fundit e kryesonte Gërvalla.

Më 17 janar 1982 Jusufi bashkë me vëllain, Bardhoshin, dhe Kadri Zekën u vranë në Untergrupenbah pranë Shtutgartit.