Nis viti i ri akademik 2018-2019 në Universitetin e Prishtinës

Sot filloi Viti i ri akademik 2018-2019 për studentët e Universitetit të Prishtinës.

Me këtë rast Universiteti i Prishtinës “Hasan Prishtina” ka organizuar Ditën e Orientimit për Studentët e Rinj. Në këtë pritje morën pjesë të gjitha njësitë akademike dhe zyrat që kanë kontakt me studentët, ku përmes këndeve informuese për secilin fakultet, studentët e rinj patën mundësi të informohen lidhur me studimet në Universitetin ei Prishtinës “Hasan Prishtina” .

Rektori i Universiteti i Prishtinës “Hasan Prishtina” , Marjan Dema tha se UP e ka për mision të krijojë liderë e studentë kreativë ndërsa informoi studentët edhe për mundësitë e studimeve jashtë vendit, përmes shkëmbimit të studentëve. Ai u garantoi studentëve të rinj mbështetje të plotë për studime cilësore. “Mësoni, angazhohuni dhe mos u dorëzoni”, u tha Dema studentëve. Kurse, zëvendësministri i Arsimit, Heset Sahiti u tha studentëve se e ardhmja e tyre varet nga këto studime. Ai falënderoi profesorët për kontributin e tyre ndër vite, duke shtuar se MAShT është duke u angazhuar në përmirësimin e cilësisë në arsim. “Arsimi i lartë është forca kryesore shtytëse e ndryshimit shoqëror,” tha Sahiti.

Mirëpo, as kjo ditë nuk do të kalojë pa shprehjen e pakënaqësive ndaj gjendjes së arsimit në Kosovë, e veçmas të atij universitar. Parlamenti i Studentëve të universitetit të Prishtinës “Hasan Prishtina” sot me fillim nga ora 13:00, organizon marsh për të shprehur pakënaqësi për gjendjen në arsim.