Opozita nuk e përkrah Rezolutën e pushtetit: Ka synim forcimin e Thaçit në dialog!
Opozita nuk do ta përkrahë Draftin e Rezolutës së propozuar nga liderët e koalicionit qeverisës për dialogun me Serbinë.
LDK-ja thotë se nuk bëhet pjesë e ekipit qeveritar të dialogut. Deputeti i kësaj partie Ismet Beqiri, thekson se vetëm zgjedhjet e parakohshme janë zgjidhje për të dalë nga kriza e thellë politike dhe institucionale, pasi pozita nuk ka legjitimitet për të udhëhequr me dialogun, raporton KTV.
“Ne kërkojmë që të mbahet seanca e jashtëzakonshme e Kuvendit për rezolutën e propozuar nga opozita. Pra, as nuk e përkrahim këtë Rezolutë, e kuptohet, as nuk bëhemi pjesë e kurrfarë ekipi për dialog. Ne jemi për dialog, por jo për çfarëdo dialogu, aq më tepër, i udhëhequr nga këto institucione, ky koalicion i pakicës, koalicion që nuk ka legjitimitet politik, institucional dhe qytetar”, tha Beqiri.
Edhe dy partitë e tjera opozitare, Vetëvendosje dhe PSD, përmes anëtarëve të tyre, në rrjetet sociale, kanë thënë se nuk e përkrahin draft-rezolutën e propozuar nga partitë në pushtet.
Por, sipas propozuesve, dokumenti ka për qëllim unifikimin e skenës politike në Kosovë.
Dje, liderët e koalicionit qeverisës kanë hartuar një draft-rezolutë me 6 pika, në të cilat theksohen parimet kryesore të pjesëmarrjes së Kosovës në Dialog.
