Nënkomisar Nuhu dëshmoi/ Gazetari Basir Çollaku, në Prokurorinë e Tiranës në orën 13:00
Drejtori i Informacionit në Televizionin Shijak, Basir Çollaku është thirrur sot në orën 13:00 në Prokurorinë e Tiranës.
Çollaku është kallëzuar nga kryetari i grupit parlamentar të Partisë Socialiste, Taulant Balla për “kallzim të rremë” dhe “fyerje” të qëllimshme.
Kallëzimi erdhi menjëherë pas publikimit të dëshmisë së Nënkomisarit Emiljano Nuhu, i cili akuzon Taulant Ballën, deputetin Rrahman Rraja dhe kryebashkiakun Artur Bushi për kërcënim me armë në zyrën e tij në komisariatin e Krujës.
Sipas dëshmisë, Nënkomisari u kërcënua për të liruar djalin e deputetit Rrahman Rraja i cili ishte paditur nga Xhisiela Maloku.
Basir Çollaku tha se do të paraqitet sot në Prokurorinë e Tiranës ku do të kërkoj hetimin e plotë të të gjitha deklarimeve të Nënkomisarit për çdo zyrtar dhe politikan, për çdo përgjegjësi të tyre.
“Kërkojmë dhënien e drejtësisë,” tha Drejtori i Informacionit në Televizionin Shijak, Basir Çollaku.
Ndryshe, në kallëzimin e tij, kryetari i grupit parlamentar të Partisë Socialiste, Taulant Balla kërkon: “Fillimin e hetimeve dhe regjistrimi i procedimit penal ndaj shtetasit ‘Kallëzimit të rremë’ për kryerjen e një krimi që dihet se nuk është kryer ose për kryerjen e një krimi nga një person që dihet se nuk e ka kryer atë, si edhe, krijimi i provave të rreme me qëllim që të bëhen ndjekje penale, ‘Fyerjes’ së qëllimshme e personit e cila përbën kundërvajtje penale dhe kur kryhet botërisht përbën kundërvajtje penale të parashikuar në nenin 305, 119 dhe 120 të Kodit Penal”.
