Gashi dhe Gina të pezulluar/ Gjykata e Apelit bën nul urdhërin e Arta Markut

Gjykata Administrative e Apelit ka rrëzuar vendimin e prokurores së përgjithshme të përkohshme, Arta Marku për pezullimin nga detyra të çiftit të prokurorëve Rovena Gashi dhe Dritan Gina.

Gjykata rrëzoi urdhrin e pezullimit nga detyra, duke argumentuar se urdhri ishte në kundërshtim me ligjin. .

Pezullimi ndaj çiftit të prokurorëve është bërë më 14 maj të këtij viti, për shkak se prokuroria e Durrësit ka ngritur akuzë dhe ka marrë në cilësinë e të pandehurit si Rovena Gashin ashtu dhe Dritan Ginën për refuzim dhe deklarim të rremë të të ardhurave.

“Pezullimi i z.Gina u vendos pasi Kryeprokurorja u njoh me informacionin e Prokurorisë pranë Gjykatës së Shkallës Parë Durrës në lidhje me ngritjen e akuzës dhe marrjen në cilësinë e të pandehurit të shtetasit Dritan Gina për veprën penale: Refuzimi për deklarimin, mosdeklarimi, fshehja ose deklarimi i rremë i pasurive, interesave private të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim, në formën e deklarimit të rremë, parashikuar nga neni 257/a-2 i Kodit Penal. Prokurori Gina do të jetë i pezulluar deri në përfundim të hetimeve ose gjykimit të procedimit penal të regjistruar pranë Prokurorisë pranë Gjykatës së Shkallës Parë Durrës”, njofton prokuroria.

Ndërkoh pas shfuqizimit nga Gjykata e Apelit, të pezullimit nga detyra të dy prokurorëve, Rovena Gashit dhe Dritan Ginës, ka reaguar edhe avokati i prokurorëve, Çlirim Gjata.

“Sot Apeli vendosi se pezullimi nga detyra ishte i paligjshëm. Pezullimi i Rovena Gashit, e cila ka qenë drejtore e dekriminalizimit, erdhi në një kohë kur filluan të dilnin emra politikanësh,” tha Gjata duke shtuar se më në fund doli një gjykatë që ndali revanshin e Kryeprokurores.

Duke u ndalur te procesi i Vetting-ut, Gjata tha se ai u zhvillua gjatë kohës që prokurorët ishin në hetim, në mënyrë që të ndikohej në rezultatin e tij.

Pas shfuqizimit të pezullimit nga detyra, tashmë sipas Gjatës, Dritan Gina mund të kthehet menjëherë atje ku ka qenë, ndërsa për prokuroren Rovena Gashi pritet edhe vendimi i Gjykatës së Strasburgut.

Ndryshe, pasi këtij vendimi, në detyrë duhet të kthehet vetëm Dritan Gina, pasi bashkëshortja e tij, Rovena Gashi u shkarkua nga Vettingu.