Fondi i Kompensimit/ Dëmet nga aksidentet, AMF miraton shtesë 274 milionë lekë

Autoriteti i Mbikëqyrjes Financiare, AMF, ka miratuar një tjetër shtesë në Fondin e Kompensimit që do të shkojë për pagesën e dëmeve të papaguara nga kompanitë e sigurimit dhe që i përkasin periudhës deri më 31 dhjetor 2013.

Në një vendim të fundit të tetorit, AMF nënvizon se kjo shtesë është në masën 274 milionë lekë dhe ka ardhur si rezultat i kërkesës së bërë nga Byroja Shqiptare e Sigurimit për praktika të shpërndara për ngjarjet deri në fund të 2013-ës sipas një vendimi të gushtit.

“Bazuar në nenin 45, pika 4, të Ligjit nr. 10076, datë 12.02.2009 “Për sigurimin e detyrueshëm në sektorin e transportit”, i ndryshuar, miratohet shtesa e fondit të kompensimit për vitin 2018, sipas propozimit të BSHS-së në vlerën 274,421,905 lekë. Të urdhërohet Byroja Shqiptare e Sigurimit të llogarisë vlerën respektive për çdo shoqëri sigurimi të kësaj shtese.

Shoqëritë e sigurimit, pavarësisht shtrirjes së pagesës të praktikave, duhet të pasqyrojnë në pasqyrat financiare të vitit 2018, vlerën korresponduese të kësaj shtese” thuhet në vendimin e AMF.

Pagesa e dëmeve do të nisë gjatë vitit 2018 dhe pritet që të shtrihet edhe gjatë vitit 2019. Kjo nuk është hera e parë që AMF miraton një shtesë në Fondin e Kompensimit lidhur me pagesën e dëmeve të prapambetura. Gjatë muajit gusht, AMF miratoi një shtesë 181 milionë lekë për dëme që I përkisnin periudhës 1 janar 2014. Në atë kohë Byroja Shqiptare e Sigurimit, konstatoi se deri më 31 maj 2018, referuar situatës së dëmeve të fondit të kompensimit të papaguara për ngjarjet pas 1 janar 2014 e në vazhdim të përfunduara,  vlera e tyre në total ishte 229,058,962 lekë.

Shtesat e bëra përgjatë vitit i bashkohen sipas logjikës Fondit fillestar të miratuar nga AMF. Kjo e fundit do në nënvizonte në fillim të vitit se masa e Fondit të Kompensimit për detyrimet e mbartura dhe që do të lindin për vitin 2018 vlerësohej rreth 1.8 miliardë lekë, e ndarë: 1.25 miliardë lekë për ngjarjet nga viti 2001 deri 31.12.2013 ku përfshihen detyrime të papaguara, që janë në proces trajtimi apo proces gjyqësor pa vendim të formës së prerë dhe 418 milionë lekë për ngjarjet nga viti 2014 deri në 31.12.2017 ku përfshihen detyrime të papaguara, që janë në proces trajtimi apo proces gjyqësor pa vendim të formës së prerë, dhe jo më pak se 150 milionë lekë për ngjarjet që mund të ndodhin gjatë vitit 2018.