“Shkëlzen Berisha ka trafikuar drogë”/ Gjykata e dënoi, Romeo Karaj: E huazova nga Izet Haxhia…
Gjykata Penale e Tiranës ka dënuar sot me 500 mijë lekë gjobë për shpifje juristin Romo Karaj, pas kallëzimit të Shkëlzen Berishës.
Për deklaratën e bërë përmes Facebook-ut, se djali i ish-kryeministrit Sali Berisha ka bërë trafik droge, Romeo Karaj është dënuar me gjobë për veprën penale ‘Shpifje e kryer botërisht”, e parashikuar nga Neni 120/2 i Kodit Penal, raporton Panorama.
Shkëlzen Berisha është përfaqësuar në gjykatë nga avokati Besnik Çerekja, ndërsa Romeo Karaj nga avokati Korab Cani.
Për Romeo Karën, vendimi i Gjykatës është i padrejtë, i dhënë nga një gjyqtar që kontrollet nga ish-kryeministri Sali Berisha.
Ndërkaq, burime pranë studios ligjore të avokatit Çerekja, thanë se, “Romeo Karaj i shmangej njoftimit për zhvillimin e këtij gjykimi. Madje janë konsumuar te gjitha format e njoftimit që parashikon Kodi i Procedurës Penale, duke i bere njoftim edhe me ane te komisariatit te policisë’.
Romeo Karaj, pas vendimit, është shprehur se:
“Siç kam paralajmeruar muaj me pare, vegla e bindur e Sali Berishes, gjyqtari Ahmet Metalija, sot ne kundershtim me ligjet e vendit, vendimet e Gjykates se Strasburgut dhe te Gjykates se Larte, me shpalli fajtor per shpifje ndaj Shkelzen Berishes, lidhur me thenien: a e mban mend kur coje heroinen ne Vlore tek vila e Landit të Jasharit?
Ne menyren me te pacipe, une deklarohem fajtor, per nje thenie ne vitin 2017 të cilen une e huazova nga nje interviste televizive te dhene nga Izet Haxhiaj ne vitin 2014. Edhe pse une nuk jam burimor i kesaj thenieje, perseri gjykatesi i Sali Berishes me deklaroi fajtor”.
Ndërkohë, në konkluzionet e përfaqësuesit ligjor të Shkëlzen Berishës, thuhet se, statusi në Facebook i Karajt: “Atë heroinen që coje me makinën e babit dhe karburantin e shtetit te Landi i Jasharit në Vlorë, nuk e ke harruar besoj”, ka cënuar nderin, dinjitetin dhe personalitetin e Shkëlzen Berishës.
“Në datë 20 tetor 2017, shtetasi Romeo Karaj me anë të rrjetit social Facebook deklaron, ne profilin e tij personal se viktima akuzuese Z. Shkëlzen Berisha ka kryer një vepër të rëndë penale.
Ky shtetas deklaron shprehimisht se: Këto shpifje erdhën fill pas ngjarjes së rëndë që po hetonte Prokuroria e Krimeve të Rënda në lidhje me implikimin e mundshëm të ish-ministrit të brendshëm Z. Saimir Tahiri në trafikun ndërkombëtar të lëndëve narkotike, në periudhën që Z. Saimir Tahiri ka qenë i ngarkuar me detyrë te lartë
shtetërore.
Përhapja e thënieve të sipërcitura përveçse cënojnë rëndë nderin, dinjitetin dhe personalitetin e Z. Shkëlzen Berisha u bënë në një kohë të trazuar politike me qëllime kredo-politike apo çdo qëllim tjetër, të ndryshëm nga ai i informimit të publikut”, thuhet në konkluzionet e avokatit të Shkëlzen Berishës, paraqitur në Gjykatë.
