Dita e Flamurit/ Maqedoni, shqiptarët në Festë, në Shkupin me dy realitete kombëtare…
Me rastin e 28 Nëntorit, Ditës së Flamurit dhe pavarësisë së Shqipërisë sot në Shkup u organizua Akademi Solemne nën kujdesin e kryetarit të BDI-së, Ali Ahmeti ku morën pjesë zyrtarë të lartë shtetëror dhe partiak.
Ndërkohë në qytetin e Shkupit, në kufirin administrativ mes komunës së Çairit dhe Butelit vërhehej edhe një kufi i mundësisë së festimit të kësaj dite të shenjtë për shqiptarët.
Nëpër rrugët e Çairit sot mund të vërehej prani e flamujve shqiptar ndërsa në komunën e Butelit ndodh e kundërta. Kjo ndarje vjen sepse kështu është paraparë në Ligjin për simbolet që komunat me mbi 50% popullsi shqiptare të kenë të drejtë të përdorin flamurin kombëtar ndërsa ato me rreth 20% mos të kenë këtë të drejtë, raporton Alsat-M.
Qytetarët shprehen të pakënaqur me pozitën e flamurit kombëtar që sipas tyre ka fatin e njëjtë me ligjin përdorimin e gjuhës amtare. Edhe në këtë rast, përdorimi i simbolit kombëtar varet nga përqindja e shqiptarëve nëpër komuna.
“Nuk është e drejtë, flamuj duhet të ketë edhe atje sepse edhe atje ka shqiptarë dhe duhet të jenë dikund 30% sipas mendimit tim. 01:10 -21 Duhet të respektohet, pasi respektohet dygjuhësia dhe po flitet, ashtu duhet të respektohet edhe flamuri, të ketë flamur edhe në komunën e Butelit dhe gjithkund,” thekson një qytetar derisa tjetri shton:
“Kjo nuk është aspak e drejtë sepse edhe atje ka shqiptarë që jetojnë por nuk e di përse ndodh kjo.”
Situatë e ngjashme me Çairin dhe Butelin mbizotëron edhe në Komunën e Kumanovës dhe atë të Likovës. Likova me popullsi shqiptare prej 97.42% ka të drejtë të përdor flamurin por jo edhe Kumanova me 25.8 shqiptar.
Shpëtim Pollozhani, nga shoqata e ish të dënuarve politik shqiptar thotë se ligji mbi përdorimin e simboleve është denigrues, jo vetëm për shkak të kufizimeve për përdorimin e tij, por edhe për shkak të formës apo madhësisë që duhet të jetë për një të tretën më i vogël se flamuri shtetëror. Pollozhani thotë ligji për përdorimin e simboleve duhet të pësoj ndryshime dhe të kaloj së bashku me ligjin për përdorimin e gjuhëve.
“Më vjen keq që çështja e flamurit me të vërtetë është keqpërdorur, nuk është rregulluar me ligj si duhet. Në një mënyrë ligji aktual për përdorimin e flamurit është denigrues, është poshtërues dhe nënçmues për shqiptarët për arsye se akoma është në fuqi ligji i cili urdhëron që madhësia e flamurit shqiptar të jetë për 1-3 më i vogël nga përmasa se flamuri shtetëror. Kjo gjë duhet urgjentisht të rregullohet- deklaroi Shpëtim Pollozhani, ish i përndjekur politik.”
Në bazë të ligjit, bashkësitë etnike mund ta përdorin flamurin e tyre, bashkë me atë shtetëror në objekte të karakterit lokal dhe publik. Në bazë të ligjit, pushteti lokal vendosë për datat ose ngjarjet kur do të përdoret flamuri i bashkësive etnike. Flamuri pa pengesa mund të përdoret vetëm se në manifestime private.
Ligji për përdorimin e simboleve të bashkësive etnike është miratuar në vitin 2011 dhe atëherë nga Bashkimi Demokratik për Integrim ishte vlerësuar si e arritur e madhe për shqiptarët e Maqedonisë.
