Më 26 dhjetor Parlamenti seancë të jashtëzakonshme për dialogun

Të mërkurën, 26 dhjetor, Parlamenti i Kosovës do të mbajë seancë të jashtëzakonshme për të diskutuar mbi dokumentin e përgatitur nga Qeveria e Kosovës, si “Draft marrëveshja gjithëpërfshirëse midis Kosovës dhe Serbisë”, raporton RFE.

Seanca është thirrur me kërkesën e 40 deputetëve të Lëvizjes Vetëvendosje dhe Lidhjes Demokratike të Kosovës.

Ndërkaq, sot Qeveria e Kosovës po ashtu ka miratuar Projektligjin që përcakton detyrat, përgjegjësitë dhe kompetencat e Delegacionit Shtetëror të Kosovës në procesin e dialogut me Serbinë.

Po ashtu, Parlamenti i Kosovës tashmë ka miratuar një rezolutë mbi procesin e dialogut për normalizimin e marrëdhënieve në mes Kosovës dhe Serbisë.

Ndryshe, dialogu ndërmjet Kosovës dhe Serbisë ka nisur më 2011. Bashkimi Evropian, që ndërmjetëson këtë proces, ka kërkuar nga të dyja palët që në fund të dialogut të arrijnë një marrëveshje për normalizimin e marrëdhënieve, e cila veç tjerash, pritet t’u hapë perspektivën evropiane të dyja vendeve.