Krishtlindje në errësirë, dështon OSHEE

Zona të shumëta në gjithë vendin e kaluan vigjiljen e Krishtlindjes në errësirë dhe si zakonisht edhe në këtë kremte të rëndësishme fetare autoritetet shtetërore paaftësinë e tyre ia faturojnë motit të keq.

Mbrëmë, një pjesë e qytetit dhe fshatrave të Korçës mbetën pa energji elektrike, ashtu si edhe shumë fshatëra të Lezhës, Fieri dhe Librazhdi.

Korça po e feston Krishtlindjen me dëborë. Aktualisht nuk raportohet për probleme në rrugë por një defekt në transformatorin e nënstacionit të Korçës ka lënë pa energji elektrike prej mbrëmjes së të hënës disa lagje të qytetit dhe fshatra.

Pa energji janë Voskopoja, Dardha, Vithkuqi, Voskopi dhe fshatra të fushës së Korçës. Raportohet se defekti në transformator ka ardhur si pasojë e motit të keq.

Punonjës të OSHEE-së ndodhen në terren për riparimin e defektit por nuk saktësojnë se kur mund të përfundoj riparimi.

“Brigadat e OSHEE, Tensioni i Lartë, ka ngarkuar dhe nisur drejt Korçës një transformator të ri, për ta vënë në punë dhe stabilizuar situatën. Qyteti i Korçës furnizohet në mënyrë të alternuar, në kushtet kur Nënstacioni ka dy trasnformatorë jashtë pune. Procesi teknik i vendosjes se transformatorit të ri kërkon 48 orë, por jemi të angazhuar për ta likujduar si proces brenda 24 orëve” thekson OSHEE.

Ndërkohë edhe në Lezhë raportohet se në shumë fshatra ka pasur mungesë të energjisë elektrike. OSHEE thotë se është punuar gjatë natës dhe ditës së sotme dhe situata tashmë është normalizuar.

Problematika më e madhe ishte në Zejmen, i cili furnizohet nga një fider ajror me gjatësi mbi 50 km.Mësohet se është vendosur në punë fideri Zejmen dhe po i jepet energji gradualisht çdo fshati përmes manovrimeve. Si pasojë e motit të keq problematika pati gjatë natës kishte edhe në Portëz të Fierit dhe Librazhd.

Absurd ishte dhe mbeti papërgjegjshmëria shtetërore e cila nuk shpreh gatishmëri për krijimin e kushteve as edhe një ditë të vetme, kur njerëzit kremtojnë festën e tyre më të rëndësishme të vitit!