Thaçi: Ekipi negociator më 8 janar në Bruksel, unë në Brezovicë

Presidenti i Kosovës, Hashim Thaçi, tha se do të punojnë për arritjen e një marrëveshjeje të balancuar me shtetin e Serbisë dhe në interes të paqes dhe stabilitetit.

Në takimin e fundit për këtë vit me gazetarë, Thaçi tha se do t’i mbështesë të drejtat e shqiptarëve në Luginë, kurse, shtoi se ekipi negociator është pajtuar që më 8 janar të jetë në Bruksel, ndërsa, ai do të jetë për skijim në Brezovicë.

“Ne do të punojmë shumë seriozisht duke iu përgjigjur nevojave të vendit, qytetarëve dhe shtetit; për fqinjësi të mirë, që në muajt në vijim të arrihet marrëveshje gjithëpërfshirëse, që Kosova të fitojë njohjen nga Serbia me një marrëveshje e balancuar,” tha Thaçi duke shtuar se Delegacioni ka legjitimitetin qytetar, por do të ishte me interes të ketë përfshirje edhe më të gjerë.

“Ekipi negociator do ta ketë përkrahjen time të plotë dhe se Kosova është gati për dialog!”  

Ndërsa, në lidhje me Gjykatën Speciale, Thaçi tha se Kosova nuk ka çfarë të fshehë e për çështjen e ushtrisë, Thaçi ka ripërsëritur se gabimi i vetëm është që Kosova është vonuar pesë vjet për themelimin e saj.