Moti “ndanë” Evropën: Lindje e acartë, Perëndim i thatë dhe me diell

E gjithë Evropa do të përballet me reshje bore dhe acar, ndërsa disa rajone qendrore dhe lindore janë mbuluar që prej Vitit të Ri me një petk bore.

BBC paralajmëron se Evropa Qendrore në mënyrë të veçantë do të përballet me reshje të mëdha shiu, ndërsa Britania e Madhe do të qëndrojë e thatë, por me temperatura të ulëta deri në -10 gradë celsius gjatë fundjavës.

Meteorologët flasin për kontraste të mëdha moti nëpër Evropë ditët e ardhshme, me një zonë të konsiderueshme presioni të lartë që reziston në Perëndim.

Ata parashikojnë qiej të pastër në këtë zonë, ndërsa më në lindje, historia ndryshon.

Sipas BBC, era e fortë do të fryjë nga veriu, përmes Finlandës drejt Austrisë, por edhe më tej drejt Ballkanit.

Përveç vendit tonë, reshjet e borës që kanë nisur që prej të enjtes, në Greqi kanë mbuluar territore të gjera të vendit, madje edhe zonat bregdetare, ndërkohë që edhe Italia fqinje ka regjistruar reshje të konsiderueshme.

E njëjtë është situata edhe në Kosovë e Maqedoni. Meteorologët thonë se reshjet e borës do të vazhdojnë në këto rajone të Evropës Lindore edhe gjatë fundjavës. Mot i thatë dhe me diell, ndërkohë, sipas tyre do të mbizotërojë në Spanjë dhe Portugali.