Reçaku sinonim i lirisë së Kosovës
Sot mbushen 20 vjet nga Masakra e Reçakut, ku forcat serbe forcat vranë 45 civilë të këtij fshati.
Ngjarja e cilësuar si një nga masakrat më të rënda, shënoi një pikë kthese në luftën e Kosovës. Ambasadori Villiam Valker, ish shef i Misionit Verifikues të OSBE-së, i cilësoi vrasjet si masakër dhe krim kundër njerëzimit. Ngjarja shënoi fillimin e një fushate të re diplomatike në përpjekje për t’i dhënë fund luftës në Kosovë.
Në mëngjesin e 15 janarit të vitit 1999, forcat serbe ndërmorën një sulm kundër fshatit Reçak të Komunës së Shtimes, ku bastisen shtëpitë, ndanë meshkujt dhe ekzekutuan rreth 45 prej tyre. Adem Ramadani, tani kryetari i fshatit Reçak, ndërsa ishte pjesëtar i Ushtrisë Çlirimtare të Kosovës, thotë se edhe pse kanë kaluar 20 vjet nga ajo ditë e dhimbshme, për banorët e Reçakut kjo ditë përkujtohet sikur të ketë ndodhur sot.
“Për banorët e fshatit Reçak, është sikur atë ditë që ka ndodhur. Nuk llogariten 20 vjet. Fëmijëve të të rënëve u mungojnë gjithmonë e s’mund t’i harrojnë. Çdo vit, kur është përvjetori, është një dhimbje e madhe për fshatin Reçak.”
Të nesërmen ish drejtuesi i Misionit Verifikues të OSBE-së në Kosovë, ambasadori Uilliam Ualker, shkoi në vendin ku ishin hedhur kufomat, rrëzë një kodre, dhe e quajti aktin një masakër të kryer nga forcat serbe, krim kundër njerëzimit. Tmerret e shkaktuara në fshatin Reçak sollën vëmendjen gjithë botën së civilizuar dhe shpalosen të vërtetën rreth planit për gjenocid të Sllobodan Millosheviqit. Pas Reçakut, çështja e Kosovës u shtrua në konferencën ndërkombëtare në Rambuje e në Paris. Më pas, ndodhi ndërhyrja e NATO-së kundër forcave ushtarake serbe, largimin e tyre nga Kosova dhe vendosja e administratës ndërkombëtare në Kosovë.
Më 15 janar 1999, në Reçak, u vranë e u masakruan barbarisht 45 shqiptarë civilë të paarmatosur, në mesin e të cilëve ishte edhe një grua.
Hasan Metushi, një tjetër dëshmitar, tregon për ngjarjen dhe luftimet e ashpra që kanë ndodhur në Reçak si dhe për masakrën që tmerroi të gjithë banorët.
“Një pjesë të trupave të masakruar nuk kemi mundur t’i shohim atë ditë, pasi ka pasur luftime tërë ditën. Të nesërmen, kanë ardhur disa fshatarë që kanë shpëtuar dhe kanë lajmëruar për ngjarjen në “Kodrën e Bebushit”. Kanë qenë një pjesë të plagosur dhe i kanë masakruar, ua kanë hequr kokat, ua kanë nxjerrë mushkëritë e zemrën…”
Në Kompleksin Përkujtimor të Reçakut, është ndërtuar edhe shtatorja e mikut të shqiptarëve ish-ambasadorit, Uilliam Uoker, i cili sensibilizoi botën për masakrën që kishte ndodhur në Reçak. Kjo ngjarje është shënuar çdo vit, ndërsa tri vitet e fundit përkujtohet me shumë aktivitete, të cilat organizohen nën patronazhin e presidentit të Kosovës. Tani, 20 vjet nga masakra, banorët e fshatit thonë se janë të dëshpëruar me faktin se askush nuk u dënua për krimet e kryera.
