“Për pushime” në Francë, shqiptari përfundon në burg…

Një 29-vjeçar shqiptar i akuzuar për trafik droge, u dënua me 1 vit burg nga Gjykata e Qarkut Annecy në Francë.

Në Francë ai kishte mbërritur disa ditë më parë, por  ishte ndaluar më 22 janar në një hotel në Seynod pasi ishte parë duke shitur lëndë narkotike në rrugën Creuse. Pas hetimeve, policia kishte zbuluar se ai qëndronte në një hotel ku shqiptari me të parë policinë kishte hedhur pakon e drogës nga dritarja e hotelit duke pretenduar se ishin cigare. Në qese kishte 5 gramë kokainë ndërsa nga shitja e lëndës narkotike, thuhet se do përfitonte një shumë prej 210 Euro.

Para togave të zeza, këtë të enjte shqiptari mohoi akuzat duke u shprehur se kishte shkuar për pushime në Annecy. Ndërkohë bëhet e ditur se edhe nga autoritetet në Shqipëri, ai akuzohej për trafik kanabisi. Në fund, ai u dënua me një vit burg si dhe me një urdhër ku atij nuk do t’i lejohet të shkelë më në territorin francez.